TIRANË- Prindërit e një djali 1 vjeç kanë mësuar se fëmija i tyre është infektuar me HIV. Ata të tronditur nga lajmi kanë rrëfyer për News 24 historinë.
Prindërit shprehen se dyshimet e tyre bien mbi spitalin QSUT në reanimacionin e pediatrisë, ku djali, u shtrua për disa ditë pasi vuante nga bronkopneumonia.
Akuzat e dy prindërve përforcohen pasi sipas tyre në dy teste që kanë kryer, si në shtetin gjerman dhe atë italian, kanë rezultuar negativë nga HIV-i. Prindërit e 1-vjeçarit shprehen të shqetësuar pasi sipas tzyre shteti nuk i ka ndihmuar dhe kurat e nevojshme i kanë marrë jshtë shtetit.
“Jemi dy prindër të rinj që dëshiruam shumë ti gëzoheshim dashurisë sonë. U kujdesa shumë gjatë shtatzanisë që të kisha një fëmijë të shëndetëshëm. Jemi prindër të një ëngjëlli 1 vjeçar, ai që doli në titujt e lajmeve si fëmija i infektuar me HIV me 2 prindër negativ. Si nënë nuk flas dot, vetëm zemra e di. Plagën në shpirt po e luftoj për hatër të tim biri. Asnjë pakujdesi e bluzave të bardha që unë e shikoja si shpëtim, s’do më bëjë që të heq dorë’, thotë nëna ndër të tjera.
Fillimisht ata e kanë referuar çështjen në Ministrinë e Shëndetësisë, më pas në Kryeministri, por nuk morën asnjë përgjigje.
Në këto kushte ato e dërguan në Prokurori, me prokuror, Saimir Hysi, por edhe në këtë organ nuk gjetën zgjidhje. Prokurori Hysi vendosi mosfillimin e hetimit për çështjen duke argumentuar sipas tij, që personat e kallëzuar nga dy prindërit nuk kanë bërë akte të përafërta me neglizhencën mjekësore dhe sipas tij, nuk kanë konsumuar një vepër penale. Por ky vendim, u kundërshtua nga Gjykata e Shkallës së Parë në Tiranë, që u shpreh se ka gjurmë të neglizhencës mjekësore dhe kërkoi rifillim të hetimit. Aktualisht, çështja do të vendoset në Gjykatën e Apelit.
