TIRANË– Fundi i dhjetorit 2022 dhe fillimi i vitit 2023, është periudha që do të shënojë pikun e rasteve me grip në vendin tonë. Pas 3 vitesh pandemi, viti 2022 do të mbyllet me situatë komplet tjetër epidemiologjike ku nga pandemia po kalojmë në epidemi gripi.
Megjithëse Instituti i Shëndetit Publik nuk ka bërë publike buletinin zyrtar të situatës epidemiologjike në vend, burime për Gazetasi.al konfirmuan se nga sistemi i survejancës, deri në fund të javës së kaluar janë regjistruar 10 mijë raste me insuficiencë respiratore. Kjo shifër i përket numri të vizitave tek mjeku i familjes, por parashikohet që rastet me grip të jenë dhe më shumë pasi jo të gjithë pacientët i drejtohen mjekut në shërbimin parësor.
Kjo do të thotë se tashmë kemi hyrën në zonën e riskut për të patur një epidemi gripale në mbarë vendin.
Sipas informacioneve nga ISHP, vija e kuqe që “ndez” alarmin e epidemisë, është tejkalimi i 15 mijë rasteve me insuficiencë respiratore në një javë. Duket që kjo shifër pritet të rritet deri në fund të muajit dhjetor. Ekspertët e shëndetit publik thonë se ndryshe nga vitet e shkuara kur gripi nuk ka patur qarkullim normal të tij, këtë vit krahas Covid po qarkullojnë dy nën tipe të virusit të gripit, AH1N1 dhe AH3.
“Aktualisht në vendin tonë po qarkullojnë 2 viruset e gripit, por me një përqindje pak më të lartë është AH3. Virusi AH3 ndryshon pak më shumë dhe me një periodicitet më të shpeshtë nga sezoni në sezon, por edhe brenda sezonit, kurse AH1N1 më pak”, thonë ekspertët.
Ndërsa Covid po qarkullon gjithnjë e më pak. I pyetur nga Gazetasi.al, pneumologu Arben Tanka tha se në raport me muajt e tjerë, në dy javët e fundit të dhjetorit vërehet shtim i rasteve të pacientëve të hospitalizuar.
“Kemi rritje të shtrimeve në pavione dhe në reanimacion. Komplikacionet e gripit janë më së shpeshti pneumonitë dhe bronkopneumonitë, por ka dhe të sëmurë me tumor në mushkëri që janë të shtruar. Duhet thënë se pacientët e shtruar janë mbi 70 vjeç dhe kanë sëmundje bashkëshoqëruese si diabeti, zemra etj”, thotë mjeku Tanka.
Rritja e të prekurve nga gripi, sipas ekspertëve të shëndetit publik, lidhet me numrin e vogël të vaksinimeve nga gripi që u bë këtë vit. Megjithëse fushata nisi në fund të muajit shtator, grupet në risk, fëmijët dhe pacientët kronikë nuk u vaksinuan në masën e duhur. Duket që kjo kategori është dhe më e prekura. Simptomat e virusit të gripit janë temperature e lartë deri në 39, dhimbje trupi, dhimbje fyti, kollë.
Ekspertët e shëndetit publik rekomandojnë që në çdo rast, pacienti duhet ti drejtohet mjekut të familjes për tu vizituar dhe të mos nisë mjekimin me antibiotikë pa u konsultuar më parë me mjekun specialist.
Ata këshillojnë që në asnjë rast nuk duhet të neglizhohet situata pasi komplikacionet e gripit në disa raste shkaktojnë deri dhe vdekje./GazetaSi
