KËLCYRË– Kryetari i Partisë Demokratike ndodhet në Këlcyrë këtë të shtunë ku po prezanton kandidatin e koalicionit “Bashkë Fitojmë” për këtë bashki, Arjan Kasaj. Gjatë fjalës së tij lideri demokrat u shpreh se për shkak të keqqeverisjes çdo qytetar ka humbur një rrogë vetëm për blerjen e ushqimeve. Po ashtu ai u ndal dhe tek vendimi i djeshëm i Kolegjit Zgjedhor që rrëzoi kërkesën e bërë nga koalicioni “Bashkë Fitojmë” që emri i Berishës të ishte në fletën e votimit si kryetar i koalicionit.
Sali Berisha: 14 maji është një datë e rëndësishme, sepse me 14 maj ju votoni për Arjan Kasajn, njërit nga bijtë tuaj më të shquar, një demokrat i vendosur, një intelektual i çmuar, një qytetar i përkushtuar, i cili do shkrijë energjitë e tij për t’u shërbyer juve. Do përdorë me transparencën më të madhe çdo qindarkë të taksave tuaja, do rendë në katër anët për të sjellë fondet dhe për të transformuar këtë qytet të bukur me një pozicion mahnitës panoramik. Shqiptarët, nga një komb atdhedashës, që qëndruan në trojet e tyre në shekuj dhe mijëvjeçarë, po shndërrohen në një komb mysafir në dhera të tjera, por mysafir edhe në trojet e tyre, në kuptimin që të gjitha potencialet e mëdha të vendit të tyre janë shndërruar në një mollë të ndaluar, në një mallkim për banorët e Këlcyrës dhe të gjithë Shqipërisë. Kjo sepse në 10 vite, ai që drejton qeverinë nuk mendoi për jetesën e qytetarëve, mendoi vetëm e vetëm për pasurimin e tij, vetëm e vetëm për pushtetin e tij. Edi Rama nisi karrierën e tij si kryeministër pas një akuze në një raport ndërkombëtar se ka të fshehura në llogaritë offshore 200 milionë euro. Çfarë ndodhi këto tetë vite me ne? Në vend se nga viti në vit të kishim një përmirësim ekonomik, një gjendje më të mirë, vështirësia ekonomike erdhi gjithnjë në rritje sepse Edi Rama ngriu rrogat. Nuk ka akt më të pashpirt që mund të bëjë një kryeministër sesa ngrirja e rrogave e pensioneve. Nga rritja e çmimeve, çdo shqiptar ka shpenzuar më shumë për ushqime 430 mijë lekë, sipas ekonomistëve të pavarur. Pra, çdo shqiptar ka humbur një rrogë më shumë vetëm në ushqime. Çdo pensionist ka humbur dy pensione. Edhe në vende të tjera u rritën çmime, por qeveritë e tjera ua kthyen paratë qytetarëve të mbledhura nga rritja e çmimeve. Kosova rriti me 100 euro pensionet, 100 euro u dha studentëve, 120 euro u dha rrogëtarëve. Kurse ky, paratë që mblodhi, 520 milionë euro nga rritja e çmimeve, i ndau për lukset e veta dhe klientelën e tij. Ky ndryshim është jetik për çdo shqiptar. Këta janë shndërruar në një sekt që kanë përçmim për qytetarët. Ky kryetari juaj këtu, çfarë bëri me ujësjellësin? Unë kam publikuar fotot e tubave të vjetër që i vendoste. Ju i keni dërguar te unë dhe unë i kam publikuar. Prandaj tubat çahen dhe Këlcyra nuk ka ujë. Pse nuk bleu tuba të rinj? Se i ndau me ministrat dhe deputetët lekët. Këta nuk kanë të ndaluar në hajdutërinë e tyre. Ndaj dhe 14 maji është votë në radhë të parë për veten tuaj, është votë për një ndryshim që është jetik.
A e konstatoni ju se në disa aspekte jemi më keq së në vitin 1991? Sepse lufta e egër e Edi Ramës ndaj opozitës është më e pashembullta që kur është themeluar PD. E ka kapur tmerri nga opozita dhe urdhëron mercenarët e tij të shkelin ligje dhe Kushtetutë, t’i emërojë koalicionit, kryetarin e koalicionit, të cilin ligji ia njeh në mënyrë eksplicite anëtarëve të koalicionit. Mua më bën nder se tregon tmerrin që ka nga Sali Berisha, por problemi është shikoni se çfarë qëndrimi ka ndaj opozitës. Ai e di se opozita është shtyllë e demokracisë, por pavarësisht nga kjo, do të kontrollojë edhe opozitën. I duhet të vjedhë, të vjedhë sa më shumë. Nuk lejon ngritje komisionesh. Kërkuam ngritje komisioni për çarterin e tij taksi, ky si Sulltani Erdogan, thotë se e kam dhuratë. Por shpenzimet e udhëtimit i heqin qytetarët e Shqipërisë. Dhe ka shpenzuar 22 milionë euro me dhomë gjumi ky se lodhet shumë, njeriu që në dy të tretat e mbledhjeve nuk shkel në qeveri. Pse e do vendin pa opozitë ky? Se blen vazon e drurit 4 milionë euro. E do sepse firmos 420 milionë euro për djegësa. Do të kontrollojë çdo pushtet.
