TIRANË– Kryetari i Komisionit Qëndror të Zgjedhjeve Ilirjan Celibashi i ka dërguar një letër krerëve më të lartë të institucioneve ligjzbatuese tre ditë para zgjedhjeve vendore të 14 majit. Në letrën drejtuar Prokurorit të Përgjithshëm, Olsian Çela, drejtuesit të SPAK, Altin Dumani si edhe Drejtorit të Përgjithshëm të policisë, Muhamet Rrumbullaku, Kryekomisioneri I Zgjedhjeve kërkon koordinimin e punës për të shmangur incidentet e mundshme ditën e zgjedhjeve deri në përfundimin e procesit të numërimit të votave.
Ilirjan Celibashi: Në njohje dhe respektim të kompetencës dhe të përgjegjësisë ligjore të secilit prej institucioneve që ju drejtoni si edhe të Komisionit Qendror të Zgjedhjeve, më lejoni të sjell në vëmendjen tuaj nevojën për të koordinuar ushtrimin e këtyre përgjegjësive me qëllim parandalimin dhe evidentimin e veprave penale në fushën e zgjedhjeve në mënyrë efikase, më së paku në raport me kohën. Kjo, për përgatitjen dhe zhvillimin e zgjedhjeeve për organet e qeverisjes vendore të datës 14 Maj 2023. Mbi sa më lar, rekomandojmë të caktohen dhe të njihen reciprokisht kontaktet përkatëse, të posaçme, pritëse dhe dërguese të informacioneve të rastit. kjo veçanërisht për periudhën nga sot deri në përfundimin e procesit të numërimit të votave.
