Ish-futbollisti i Premier Ligës, Peter Ndlovu, ka pohuar se nuk mund të përballojë të paguajë 642 euro si mbështetje për dy nga fëmijët e tij, sepse ai ka 11 fëmijë të tjerë.
Ndlovu, 49 vjeç, i cili luajti në Premier Ligë për Coventry, Birmingham, Huddersfield dhe Sheffield United, tani është në Afrikë dhe është përfshirë në një betejë ligjore me nënën e dy fëmijëve në fjalë.
Ajo dëshiron që Ndlovu t’i paguajë asaj 1,605 euro në muaj, por Gjykata e Lartë e Johannesburg vendosi që ai t’i paguajë asaj 642 euro në muaj.
Ai ishte urdhëruar nga një gjykatë më e ulët të paguante paratë, por apeloi vendimin.
Ndlovu, i cili në vitin 1992 u bë lojtari i parë afrikan që u shfaq në Premier Ligën e sapoformuar, deklaroi se nuk ka pasur asnjë kontakt me dy fëmijët dhe nuk ka folur me nënën e tyre që prej se ka mbetur ajo shtatzënë.
Ndlovu insistoi se ai as nuk e dinte se fëmijët ekzistonin derisa i tha gjykatës:
“Unë kam 13 fëmijë, duke përfshirë këtu dy fëmijë me palën paditëse. Jam i obliguar që të kontribuoj dhe të përcjell gjendjen dhe nevojat e 13 fëmijëve të mi. Unë marr një pagë mujore që më përshtatet për jetesën time, nevojat e mija dhe detyrimet si dhe për të kontribuar në shpenzimet dhe detyrimet e tjera të personit që ka bërë padinë’, tha Ndlovu.
Ndlovu theksoi se ai nuk mund të përballojë të paguajë tarifat e kërkuara për fëmijët nga pala paditëse.
“Nuk ka asnjë komunikim mes palës paditëse dhe meje. Ne nuk ndajmë asnjë marrëdhënie dhe nuk ka asnjë kontakt mes nesh. Unë thjesht nuk mund të përballoj një zbritje prej 1,605 eurosh në muaj nga paga ime”, tha më tej Ndlovu.
Ish-futbollisti besohet se ka pasur fëmijë me të paktën pesë gra të ndryshme, sipas “Pindula News” në Zimbabve.
