TIRANË– Ka përfunduar marrja në pyetje e gazetarit investigativ Artan Hoxha në Drejtorinë e Policisë së Tiranës. Duke folur për mediat ai u shpreh se ky është shansi i fundit që Struktura e Posaçme Kundër Korrupsionit dhe Krimit të Organizuar (SPAK) të marrë në dorë çështjen. Sipas tij kemi të bëjmë me vrasje shtetërore. Hoxha tha se tashmë drejtësia nuk është nën presion dhe se duhet të veprojë. Sipas gazetarit katër protestuesit Ziver Veizi, Faik Myrtaj, Hekuran Deda dhe Aleks Nika janë vrarë me duar në xhepa dhe kur ishin jashtë perimetrit të sigurisë së kryeministrisë.
Artan Hoxha: Nuk është se vura re sa kohë qëndrova, por vura në dispozicion të çështjes, Prokurori kishte deleguar detyrat për oficerët e policisë gjyqësore dhe ata më kërkuan të deklaroja lidhur me çështjen. Përshëndes prokurorin që reagoi dhe që ky detaj i ri t’i japë nxitje hetimit. Kërkoj që këtë çështje ta marrë në dorë SPAK, e duhet ta hetojë SPAK. Duke pasur parasysh që është krim shtetëror ku janë përfshirë nivelet më të larta të shtetit, ka nevojë për hetim nga Prokuroria e Posaçme. Kjo është mundësia e fundit për ta zbardhur dhe hetuar në mënyrë shteruese “21 janarin”. Së pari se ka kaluar shumë kohë, e dyta se kemi SPAK, e treta se kanë ndryshuar kohërat dhe nuk jemi në presion. Nëse kalon dhe ky moment, do jemi shumë vonë për t’i dhënë përgjigje familjarëve. Të qetësohen shpirtrat e të vrarëve. Janë vrarë para kamerave, janë vrarë me duart në xhepa, nuk ishin në perimetrin e hyrjes së kryeministrisë. Të zgjidhet një herë e mirë kjo histori.
