Si sot 25 vjet më parë u vra Azem Hajdari, lideri i Lëvizjes Studentore 1990-1991 e njëkohësisht njeriu që simbolizon nisjen e periudhës së demokracisë në vendin tonë.
Rikujtesë:
Më 12 shtator të vitit 1998, Azem Hajdari ndodhej në qytetin e Fierit, ku edhe merrte pjesë në një miting të organizuar nga Partia Demokratike, më pas u ndal në Lushnje dhe më pas mbërriti në Tiranë.
Në mbrëmje u kthye në zyrën e tij në selinë e Partisë Demokratike, ku po zhvillonte takime të tjera, por u shkëput vetëm pak për të takuar bashkëshorten e tij, e cila ishte në pritje të një djali dhe dy fëmijët e tjerë, Rudinën dhe djalin e madh, Kirjald. Pas takimit me ta, rreth orës 20:00, flitet se dikush e kishte marrë në telefon dhe i kishte kërkuar që të dilte jashtë, moment që shënoi dhe vdekjen e tij.
Pavarësisht shumë engimave mbi vrasjen, dosja “Hajdari”është mbyllur përfundimisht dhe Izet Haxhia është personi i dënuar me 21 vite heqje lirie pasi u shpall fajtor si bashkëpunëtor në vrasjen e deputetit të Partisë Demokratike.
Këtë të Martë, në “Varrezat e Dëshmorëve” kanë nisur homazhet në nder të tij, ku të pranishëm ishin familjarë, miq e anëtarë të “Grupimit Dhjetor ‘90”, ndër ta dhe ish-kryeministri Sali Berisha.
Berisha dhe mbështetësit e tij kanë organizuar një ceremoni në “Varrezat e Dëshmorëve”, ku kanë lënë buqeta me lule në varrin ku prehet Azem Hajdari, ndërsa më pas do zhvendosen tek Memoriali i Azem Hajdarit.
Në këtë ceremoni marrin pjesë familjarët e Azem Hajdarit, bashkëshortja Fatmira Hajdari, Rudina Hajdari, Kird Hajdari dhe partnerja e tij.
Nga deputetët e PD, kanë marrë pjesë Sali Berisha, Albana Vokshi, Edi Paloka, Saimir Korreshi, Dhurata Çupi, etj,
Berisha tha se vrasja është shtetërore dhe se sot pas 25 vitesh ai është i gjallë dhe i pavdekshëm në zemrat e atyre që jetuan diktaturën dhe panë tek ai shpëtimtarin e tyre.
Mesazhi i Sali Berishës:
‘”Sot, ne jemi këtu për të nderuar legjendën e guximit, trimërisë, të të rinjve shqiptarë, të studentëve shqiptarë, tribunin e lirisë, Azem Hajdari, në 25-vjetorin e ekzekutimit të tij shtetëror, nga falanga me uniformë të shtetit terrorist, vetëm e vetëm për bindjet e tij politike, së bashku me sivllaun e vet, Besim Çerja, të cilët një natë të 12 shtatorit 1998, ranë në breshëritë e kallashnikovëve të bandës shtetërore terroriste, të organizuar pa dyshim në aktin hakmarrës primitiv nga pushteti i atëhershëm.
Azem Hajdari përbën një nga figurat më të rralla të historisë tonë kombëtare. Asnjë shqiptar, si individ, nuk ka bërë aq sa ka bërë Azem Hajdari së bashku me studentët liberatorë për liritë e shqiptarëve.
Mbetet pra, një nga figurat më të jashtëzakonshme në historinë e lirisë së këtij kombi. Sot nuk është e lehtë të imagjinosh dhjetorin e vitit 1990, kur ai u ngrit me një grup studentësh, me thirrjet: Liri, Demokraci, Poshtë Diktatura’.
Ai u shndërrua në një magnet të fuqishëm të rinisë studentore, një lider epik me guximin e tij, i cili në një kohë të shkurtër gjunjëzoi diktaturën.
Ekzekutimi i tij, para selisë së PD, është vrasja shtetërore më e rëndë në historinë e shqiptarëve. Është atentati më makabër!
Azem Hajdari, edhe sot pas 25 vitesh, është i gjallë dhe i pavdekshëm në zemrat e atyre që jetuan diktaturën dhe panë te ai, shpëtimtarin e tyre. Është i pavdekshëm dhe i përjetshëm në altarin e lirisë të kombit shqiptar.
Kurse ata, që në një akt hakmarrje primitive, organizuan pritën dhe e ekzekutuan atë, do të mbeten të damkosur përjetë për krimin më të shëmtuar politik të kohërave.
Azem Hajdari është një kushtrim i gjallë për të gjithë shqiptarët, që sot të ngrihemi, të përmbysim diktaturën e drogës, diktaturën e krimit, diktaturën e vjedhjeve të pasardhësit direkt të njërit prej xhelatëve më të pamëshirë të kombit në histori, Edi Ramës”.
Kryetari i PD-së pavarësisht se nuk ndodhej sot në Tiranë e kujtoi atë më një mesazh:
Mesazhi i Lulzim Bashës:
“25 vite më parë u vra pabesisht Azem Hajdari, lideri i Lëvizjes Studentore që me veprën e tij të pavdekshme u bë simboli i vullnetit të shqiptarëve në përballjen me regjimin komunist dhe ngadhnjimin e lirisë mbi diktaturën.
Kurajo, antikonformizimi dhe vendosmëria përkundër fuqive në dukje më të mëdha janë testamenti politik i jetës politike të shkurtër por të pashoq të Azem Hajdarit. Angazhimi politik për Azem Hajdarin ishte një instrument për ti shërbyer njerëzve dhe jo vetes, për të përmirësuar dhe ndryshuar jetët e shqiptarëve të etur për ndryshim dhe jo për të ringritur sarajet e reja të luksit dhe pushtetit personal mbi muret e vjetra të arrogancës, korrupsionit dhe hipokrizisë së regjimit komunist.
Kontributi i tij në altarin e lirisë dhe demokracisë do të nderohet përherë, si dëshmia më domethënëse e forcës së një populli të shtypur dhe nëpërkëmbur për të sfiduar frikën dhe apatinë, për të triumfuar mbi të keqen dhe për të ndërtuar përmes lirisë një të ardhme të denjë për çdo shqiptar“.
Ndërkohë edhe presidenti Bajram Begaj shpret se Azem Hajdari do të kujtohet ndër brezaq si prijës i demokracisë:
“Nderim dhe respekt për ‘Heroin e Demokracisë’, Azem Hajdari. Lideri i Dhjetorit ‘90 me trimërinë dhe guximin e tij do të kujtohet ndër breza si prijës i demokracisë”.
