KINË– Një kompani teknologjike në Kinë ka shpikur një mënyrë mjaft të çuditshme për t’i dërguar një puthje partnerit/es suaj në distancë. Produkti është thjesht një shtojcë telefoni – e pajisur me buzë silikoni të lëvizshme. Pajisja e puthjes – e quajtur Remote Kiss – është një shpikje e patentuar nga Instituti Profesional i Teknologjisë Mekatronike Changzhou në Kinë, sipas Global Times.
Jiang Zhongli, shpikësi kryesor i dizajnit, tha se ai ishte në një marrëdhënie në distancë dhe pikërisht prej kësaj, u frymëzua edhe produkti. Pajisja vjen me sensorë presioni dhe aktivizues për të imituar një puthje të vërtetë duke përsëritur presionin, lëvizjen dhe temperaturën e buzëve aktuale të njeriut.
Produkti mund të kopjojë gjithashtu edhe zhurmën që krijohet gjatë një puthjeje. Ai funksionon përmes një aplikacioni që përdoruesit duhet ta shkarkojnë në telefonat e tyre. Kjo e bën më të lehtë “sexting” dhe njohjen e njerëzve online. Megjithatë, përdoruesit e mediave sociale kanë reaguar ashpër ndaj shpikjes.
“Nuk e kuptoj, jam i tronditur”, shkruan dikush.
Një tjetër tha se “kjo është totalisht e gabuar”./Anabel
