LEZHË– Katër persona, vëllezër me njëri-tjetrin janë shpallur në kërkim këtë të premte nga Policia e Lezhës pasi akuzohen si autorë të dhunimit të 54-vjeçarit të identifikuar me inicialet B.N foto e gjakosur të cilit qarkulloi në rrjetet sociale dhe u paraqit si një konflikt për shkak të zgjedhjeve. Blutë e Lezhës bëjnë me dije se ngjarja ka ndodhur pas një konflikti për motive të dobëta. 54-vjeçari pasi ka marrë ndihmën e parë në spitalin e Rreshenit është dërguar për ndihmë të specializuar në spitalin e Traumës në Tiranë.
NJOFTIMI I POLICISË:;
Rreth orës 13:45, në spitalin rajonal të Rrëshenit, ka shkuar për ndihmë mjekësore, i dëmtuar fizikisht, shtetasi B. N., 54 vjeç, banues në fshatin Thirrë, Mirditë, i cili më pas është transportuar në Spitalin e Traumës Tiranë, për asistencë mjekësore më të specializuar. Nga hetimet e deritanishme, dyshohet se 54-vjeçari është dhunuar fizikisht nga shtetasit N. M., M. M., E. M. dhe L. M. (vëllezër), të cilët janë shpallur në kërkim nga shërbimet e Policisë dhe po punohet për kapjen dhe shoqërimin e tyre. Nga veprimet hetimore dhe procedurale të kryera deri më tani, dyshohet se këta shtetas janë konfliktuar ditën e sotme për shkak të një konflikti për motive të dobëta që ka ndodhur ndërmjet tyre para disa kohësh, dhe nuk ka lidhje me motive të tjera që janë përmendur në disa portale. Grupi hetimor vijon veprimet hetimore, në drejtimin e Prokurorisë, për dokumentimin e plotë ligjor të kësaj ngjarjeje.
