Gratë po fitojnë gjithnjë e më shumë terren në shumë fusha, ndonëse pushteti ekonomik vijon të dominohet nga meshkujt. Shumë programe adresojnë qartë problemet e barazisë gjinore, që në Shqipëri janë hartuar me asistencën e ofruar nga UN Women, ndërsa dhe financat kanë një fokus të veçantë te buxhetimi gjinor. Sipas të dhënave të Ministrisë së Financave janë identifikuar 43 programe buxhetore gjatë fazës III të përgatitjes së dokumentit të Programit Buxhetor Afatmesëm (PBA) 2021-2023 që përfshijnë në mënyrë efektive buxhetimin gjinor në kërkesat e tyre për PBA.
Ndër 43 programet buxhetore në kuadër të Programit Buxhetor Afatmesëm (PBA) 2022-2024, gjysma trajtojnë çështjet e pabarazisë gjinore në sektorë si shëndetësia, mbrojtja sociale, arsimi, drejtësia, biznesi dhe bujqësia. Elementet buxhetore përkatëse të përgjegjshme gjinore përbëjnë 9 për qind të totalit të buxhetit të planifikuar vjetor. Buxheti i Përgjithshëm Gjinor për vitin 2022, i cili adreson çështjet e pabarazisë gjinore është llogaritur si 9% e buxhetit total, ekuivalent me 52.6 miliardë lekë, ose rreth 425 milionë dollarë.
Ndërsa kjo përqindje përfaqëson një rritje të ndjeshme krahasuar me vetëm 1 për qind ose 4.2 miliardë lekë që zinte në vitin 2015.
“Për të promovuar më tej pjesëmarrjen e grave në fuqinë punëtore, Qeveria ka ofruar për të subvencionuar shërbimet e kujdesit për fëmijët dhe transportin për gratë e punësuara në bizneset e mëdha”, shpjegojnë burime zyrtare në Ministrinë e Financave.
Nga ana tjetër, Ministria e Bujqësisë dhe Zhvillimit Rural po targeton veçanërisht gratë fermerë, duke rritur numrin e përfituesve nga kjo kategori prej skemave kombëtare dhe të subvencionimit IPARD nga 14% që ishin në vitin 2020 në 25% të të gjithë përfituesve për 3 vitet e ardhshme.
Në gjashtë vitet e fundit, përmirësim ka pasur për gratë në aksesin e kredive. Masat financiare që synojnë zbutjen e pasojave të pandemisë kanë vënë në shënjestër edhe bizneset e mëdha ku gratë përbëjnë rreth 14% të pronarëve.
Gjithashtu, rreth 55% e përfituesve të transfertave të parave të papunësisë, si dhe nga “pagat e luftës” gjatë periudhës së karantinës në 2020 ishin gra./Monitor
