TIRANË- Ministria e Financave i ka kërkuar bashkive në të gjithë vendin që sa i takon strehimit social duhet të bëjnë aplikimet e tyre brenda datës 31 janar 2021 për të përfituar nga fondet në dispozicion. Këto të fundit përfshijnë ndërtimin e banesave sociale në projekte që financohen apo bashkëfinancohen nga bashkitë dhe qeveria si dhe grupin tjetër të subvencionimit të bonusit të qirave.
Financat kanë detajuar edhe mënyrën sesi duhet të bëhet aplikimi dhe dokumentacioni që duhet të shoqërojë këtë procedurë.
“Nëpërmjet kësaj shkrese ju bëj me dije mbi fondet e planifikuara për programet e strehimit për vitin 2023 dhe ju ftoj të aplikoni për mbështetje buxhetore sipas ligjit nr 22/2018 “Për strehimin social”.
Fondet për investime kanë parashikuar 150 milionë lekë për mbylljen e projekteve të filluara gjatë vitit 2022 dhe 300 milionë lekë për projektet e reja që do të fillojnë gjatë vitit 2023.
Formati i aplikimit, dokumentacioni që duhet të shoqërojë formatin e aplikimit, kriteret s’kualifikuese, sistemi i pikëzimit dhe kufijtë e financimit/bashkëfinancimit për çdo kategori projekti jepen në lidhjen 1 dhe do t’ju dërgohen me postë elektronike. Kërkesa për financim apo bashkëfinancim duhet të dërgohet brenda datës 31 janar 2023 e shoqëruar me dosjen e aplikimit.
Fondet e subvencioneve do të përdoren për programin e bonusit të qirasë dhe grantit të menjëhershëm janë respektivisht 96.2 milionë lekë dhe 6 milionë lekë. Në lidhjen 2 e cila do të dërgohet me postë elektronike do të gjeni formatin e aplikimit së bashku me tabelat përkatëse. Kërkesa për subvencionimin e qirasë duhet të dërgohet brenda muajit janar.
Të kihet parasysh që jo më pak se 5 për qind e përfituesve nga çdo program duhet të plotësohet nga familje të minoritetit Rom dhe Egjiptian” thuhet në shkresën e Financave drejtuar Bashkive./Monitor
