Kreu i Grupit Parlamentar të Partisë Socialiste, Taulant Balla, gjatë prezantimit të raportit të Këshillit për Rregulloren, Mandatet dhe Imunitetin, u ndal tek debati për ngritjen e komisioneve parlamentare, duke iu përgjigjur akuzave të opozitës se po shkelet Kushtetuta.
Balla theksoi se as kryetari i Kuvendit dhe as mazhoranca nuk do të bëjnë asnjë hap që shkel Kushtetutën.
“Ne jemi në fazën e konstituimit dhe ende nuk kemi përmbyllur ende konstituimin e organeve të Kuvendit. Duhet që sot domodoshmërisht të përmbyllim kryesinë e komisioneve që nesër të shkojmë te konferenca e kryetarëve që javës tjetër ta kemi përmbyllur procesin. Ndaj nuk na lejohet teatri. Kemi përgjegjësi. Jemi votuar për këtë agjendë. Që ta përmbyllim në 2029 anëtarësimin e Shqipërisë në BE. Shqipëria ka nevojë për një parlament që përqas agjendën e punës me kapitujt e marrëveshjes së anëtarësimit ndaj na duhet të votojmë sot ato komisione që kemi sjellë si propozim” deklaroi Balla.
Ai theksoi se është e domosdoshme një qasje e re në funksionimin e Kuvendit, për t’i kthyer komisionet në një sallë pune.
“Komisioni i Ligjeve ka 26 anëtarë, ka vende që e gjithë struktura e parlamentit ka vetëm 40 anëtarë.”
Sipas tij, votimi i komisioneve parlamentare është i domosdoshëm për të vijuar punën dhe për të përmbushur detyrimet e vendit në procesin e anëtarësimit në Bashkimin Europian.
