Ministri i Financave, z. Petrit Malaj, priti sot në një takim një delegacion deputetësh nga Parlamenti Evropian, Komiteti i Kontrollit Buxhetor, i cili kryesohej nga z.Niclas Herbst.
Qëllimi i kësaj vizite në vendin tonë është vlerësimi i krjimit të mekanizmave të kontrollit dhe auditimit për Facilitetin për Reforma dhe Rritje, si një instrument i ri i bazuar në performancë i projektuar për të nxitur dhe përmirësuar reformat.
Ministri i Financave bëri një prezantim të shkurtër të ecurisë së ekonomisë shqiptare, duke theksuar rritjen e qëndrueshme, ruajtjen e parametrave makroekonomikë dhe fiskalë, si dhe përpjekjet për reduktimin e mëtejshëm të borxhit publik, të gjithë këto të arritura përmes zbatimit të një sërë reformave të nevojshme dhe planeve konkrete të veprimit.
Në qendër të bisedimeve mes dy delegacioneve ishte edhe progresi i bërë në kuadër të reformave që po ndërmerren sa i takon Planit të Rritjes së Ballkanit Perëndimor, i miratuar nga Komisioni Europian, ku një ndër katër shtyllat ku bazohet është “Rritja e asistencës financiare për mbështetjen e reformave”.
Progresi i Shqipërisë në menaxhimin e financave publike, vuri në dukje Ministri, është konfirmuar vazhdimisht nga vlerësime ndërkombëtare inkurajuese si SIGMA dhe PEFA. Kështu, sipas vlerësimit SIGMA të vitit 2024, Shqipëria spikat si një nga administratat më të avancuara në Ballkanin Perëndimor për sa i përket strukturës dhe funksionimit të sistemeve të financave publike. Ndërkohë, raporti PEFA i vitit 2024 reflekton përmirësime të qarta, me më shumë se gjysmën e treguesve të vlerësuar me nota të larta, A dhe B, duke treguar progresin e prekshëm që është arritur.
Nga ana tjetër, Ministri Malaj theksoi rëndësinë e forcimit të kontrollit të brendshëm dhe auditimit, për të garantuar përdorimin e drejtë, transparent dhe efikas të fondeve të Bashkimit Europian.
Një kuadër i qartë për funksionimin e mekanizmave të kontrollit të brendshëm dhe auditimit të brendshëm siguron integritet, transparencë dhe efikasitet në përdorimin e fondeve të Bashkimit Evropian, ndërsa forcon sistemin për parandalimin, zbulimin, raportimin dhe korrigjimin e çdo parregullsie, mashtrimi apo korrupsioni.
Përmes këtij sistemi të konsoliduar, Ministria e Financave synon të garantojë transparencë, integritet dhe efikasitet në përdorimin e fondeve të Bashkimit Evropian. Ky është një hap i rëndësishëm që jo vetëm forcon besueshmërinë e institucioneve, por, dëshmon se Shqipëria është në gjendje të menaxhojë fonde të mëdha të BE-së me përgjegjësi, seriozitet dhe transparencë.
Ministri Malaj shprehu angazhimin e Ministrisë së Financave për të avancuar me reformat dhe për të garantuar integritetin, parandalimin e mashtrimeve dhe përputhshmërinë me standardet e BE-së, si pjesë e procesit të negociatave të anëtarësimit, ndërsa vlerësoi se këto përpjekje janë një investim i përbashkët në të ardhmen europiane të Shqipërisë dhe një garanci për qytetarët që fondet publike do të menaxhohen në mënyrën më të drejtë dhe efikase.
