Pas fjalës së kryeministrit Edi Rama gjatë prezantimit të sotëm para stafit dhe drejtuesve të Ministrisë së Brendshme, ministrja e sapoemëruar Albana Koçiu deklaroi se detyrat e ngarkuara nga kreu i qeverisë do të realizoheshin.
Ajo pranoi problematikat e institucionit, të cilin Rama e cilësoi “të prapambetur” dhe që punon me “orare të tjera kohore” nga vendi.
“Janë emergjenca të kohës, janë probleme të drejta dhe unë së bashku me MB, ekipin e saj, do ngrihemi në lartësinë e punës dhe figurës, duke nisur me punonjësit publik, duke nisur nga ata këtu, për integritetin. Për funksione të rëndësishme që janë themelet e shtetit”, pranoi Koçiu, duke ndjekur të njëjtin diskurs si shefi i qeverisë.
Ajo i vuri në dukje të pranishmëve se vendi ndodhet në moment të rëndësishëm dhe ndaj detyrat e ngarkuara duheshin realizuar, duke deklaruar publikisht se ato do kryheshin sipas porosive të kreut të qeverisë.
“Duke pasur parasysh edhe momentin ku ndodhet vendi, Europa nuk është iluzion, por realitet i prekshëm, ndaj do çojmë para këto punë që kryeministri na ka ngarkuar dhe legjislacioni na detyron, e t’i çojmë para punët. Kjo ministri duhet të flasë pak dhe të punojë shumë, ndaj duhet të flasim sa më pak e t’i çojmë përpara punët. Të gjithë t’i tregojmë kryeministrit që po do t’ia dalim dhe do t’i kryejmë të gjitha detyrat që na ka ngarkuar”, përfundoi Koçiu fjalën e saj të shkurtër.
Në fund foli edhe ish-ministri i Brendshëm, Ervin Hoxha, i cili e cilësoi privilegj dhe nder drejtimin e dikasterit për një vit, pavarësisht kritikave që kryeministri Rama i drejtoi institucionit.
“Falenderoj kryeministrit Edi Rama për vlerësimin dhe përgjegjësinë e lartë që më ngarkoi një vit më parë për detyrën e Ministrisë së Brendshme. Ishte jo vetëm nder, por edhe vlerësim. Kam hyrë 22 vite më parë në këtë ministri dhe largohem me privilegjin dhe nderin më të lartë si ministër i Brendshëm dhe deputet i Parlamentit”, tha ai.
Teksa në fund e mbylli me dy çështje të trajtuara gjatë këtij viti nga Policia dhe Ministria: Zgjedhjet e përgjithshme të 11 majit dhe sezoni veror dhe turistik:
“Dua të ndalem te puna e mirë gjatë procesit zgjedhor, kjo ishte provë e rëndësishme edhe për mua, që e kaluam me sukses. Por edhe menaxhimi i sezonit veror, pa asnjë ngjarje kriminale, zero ngjarje kriminale, viti i dytë radhazi me këtë rezultat me një fluks të lartë turistësh”, përfundoi Hoxha.
