Triumfi kundër Dinamos i ka dhënë një impuls më tepër ekipit në prag të ndeshjes kundër Vllaznisë, që do të zhvillohet këtë të diel në stadiumin “Niko Dovana”, duke nisur nga ora 19:00.
Në konferencë për mediat, trajneri Enkeleid Dobi vlerësoi atmosferën pozitive në klub, ndërsa analizoi kundërshtarin dhe foli për pritshmëritë që ka ndaj Vllaznisë.
Fitorja ndaj Dinamos – Nuk kemi pasur shumë kohë që të jemi të qetë; kjo javë ka qenë intensive. Ndoshta qetësia do të vijë pas ndeshjes me Vllazninë. Gjithmonë kur fiton duhet të jesh i kënaqur, por duhet të kemi vazhdimësi dhe stabilitet. Kjo nuk vlen vetëm për futbollin, por edhe për jetën e përditshme — është shumë e rëndësishme.
Gjendja fizike e lojtarëve – Këto ndeshje na kanë kushtuar jashtëzakonisht shumë, si nga ana fizike, ashtu edhe nga ajo psikologjike. Brenda 3 ditësh kemi zhvilluar dy ndeshje shumë të rëndësishme, kundër njërit prej favoritëve të kampionatit shqiptar. Ngarkesa dhe ana psikologjike kanë qenë të larta. Gjendjen fizike do ta shohim me Vllazninë; jemi munduar së bashku me stafin dhe klubin t’u japim lojtarëve të gjitha mundësitë për t’u rikuperuar sa më shpejt.
Stabiliteti në ekip – Nuk mund ta themi këtë tani, në ndeshjet e para. Stabiliteti shihet përgjatë gjithë kampionatit. Do të kemi edhe ditë të këqija, por shpresoj sa më pak. Stabiliteti arrihet përmes punës — kjo është një nga gjërat kryesore. Duhet të dimë për çfarë punojmë, ku duam të shkojmë dhe si ta arrijmë atë qëllim.
Neutralizimi i sulmit të Vllaznisë – Ndonjëherë gjërat nuk shkojnë siç i dëshirojmë. Jemi në proces, dhe duhet të jemi pak më të duruar që gjithçka të funksionojë siç duhet. Vllaznia, pa ia mohuar meritat, ka një sulm të rrezikshëm dhe ka formuar një ekip solid e kompakt. Siç them gjithmonë, ne përshtatemi me kundërshtarin. Do të mundohemi t’i minimizojmë pikat e forta të tyre. Në tri ndeshje kemi pësuar vetëm një gol. Edhe mbrojtja jonë është në nivelin e duhur. Do të mundohemi ta mbajmë këtë nivel dhe organizim loje, sepse janë shumë të rëndësishme për ne. Duhet të minimizojmë forcat dhe anët pozitive që ka Vllaznia.
Tifozët dhe faktori fushë – Fitorja gjithmonë të jep krahë. Kur fiton me 10 lojtarë, të jep edhe më shumë besim, por duhet të jemi me këmbë në tokë. Është vetëm fillimi. Dinamo është një kundërshtar shumë i fortë, të angazhon dhe të vendos në vështirësi. Është një ekip që ka stabilitet. Edhe ndeshjet në Europë i japin më shumë besim. Ne nuk jemi ende në atë nivel, por nëse do të jesh më i miri, duhet të fitosh kundër më të mirëve. Kjo fitore na ka dhënë jashtëzakonisht shumë zemër, por duhet të jemi të vetëdijshëm, sepse ndonjëherë euforia të çon në gabime. Tifozët mezi i presim, të vijnë edhe më shumë dhe të na mbështesin. Nga presidenca dhe i gjithë klubi po bëhet një punë e jashtëzakonshme për ta kthyer Teutën në ato nivele që i takojnë këtij qyteti dhe sportdashësve të tij. I ftojmë të vijnë, sepse do të shohin një ekip si në vitet ’90, një ekip për të cilin mund të ndihen krenarë për atë që tregon në fushë.
Mungesat e Vidal dhe Jazxhi – Presim seancën e fundit, sepse duam të shohim gjendjen e skuadrës dhe të lojtarëve. Kemi një ide për formacionin, bisedojmë me stafin. Nuk fokusohemi vetëm te puna jonë, por edhe te analiza e kundërshtarit. Duhet të minimizojmë pikat e forta të tyre dhe të godasim aty ku janë të dobët. Jemi të fokusuar. Duam të ruajmë të njëjtin ritëm, organizim loje dhe disiplinë, dhe të vazhdojmë të kemi vazhdimësi dhe stabilitet në lojë.
Progresi i ekipit – Është një zinxhir – disa hallka janë plotësuar. Nuk mund të mohojmë angazhimin e djemve, dëshirën dhe atë që shprehin në fushë. Por ende nuk jemi në nivelin që të gjithë presim. Ka ende punë për të bërë – e mira nuk ka fund, siç thuhet. Në këtë moment, jam i kënaqur me mënyrën se si skuadra përgjigjet çdo ditë dhe me atë që tregon në fushë.
