Akuzohej për marrëdhënie seksuale me të mitura, dënohet me 25 vite burg i pandehuri i dosjes penale.
Gjykata e Fierit ka pranuar kërkesën e Prokurorisë në pretencën e dhënë dhe ka shpallur sot fajtor të arrestuarin prej dy vitesh, Xhevahir Veizi, duke e dënuar me një çerek shekulli izolim.
Lajmi është konfirmuar edhe nga vetë organi i akuzës vendor, që deklaroi se dosja ishte e mbështetur mbi veprën penale të Nenit 100 të Kodit Penal.
“Rezultoi e provuar se shtetasi Xh. V, duke përfituar nga gjendja ekonomike e familjes së të miturës dhe nga njohjet që ato kishin, e ka ftuar në banesë të miturën dhe mandej ka përfituar nga gjendja e saj vulnerabël, duke kryer marrëdhënie seksuale me të”, thuhet në dosjen hetimore.
Veizi është arrestuar menjëherë pas denoncimit, më 12 janar 2023, teksa ndaj tij janë kryer hetime edhe për veprat penale për shfrytëzim prostitucioni dhe armëmbajtje pa leje. Por në fund është gjetur fajtor për krimin e marrëdhëniet seksuale me të mitur.
Njoftimi i Prokurorisë Fier:
Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm, Fier, në përfundim të gjykimit u shpall fajtor dhe u dënua me 25 vjet burg shtetasi Xh.V. për veprën penale “Marrëdhënie seksuale ose homoseksuale me të mitur” parashikuar në neni 100 i Kodit Penal.
Në kuadër të hetimeve mbi procedimin penal nr.26, datë 13.01.2023, për veprat penale “Marrëdhënie seksuale ose homoseksuale me të mitur”, “Shfrytëzim prostitucioni” dhe “Mbajtja pa leje, prodhimi i armëve, armëve shpërthyese dhe i municionit”, parashikuar në nenet 100, 114 dhe 278/2 të Kodit Penal, rezultoi e provuar se, shtetasi Xh. V, duke përfituar nga gjendja ekonomike e familjes së të miturës dhe nga njohjet që ato kishin, e ka ftuar në banesë të miturën dhe mandej ka përfituar nga gjendja e saj vulnerabël duke kryer marrëdhënie seksuale me të.
Në kuadër të këtij procedimi i pandehuri Xh.V u arrestuar në flagrancë më datë 12.01.2023.
Pas përfundimit të hetimeve, Prokuroria pranë Gjykatës së Shkallës së Parë të Juridiksionit të Përgjithshëm Fier ka dërguar për gjykim të pandehurin Xh.V, për veprën penale “Marrëdhënieseksuale ose homoseksuale me të mitur” parashikuar në neni 100 i Kodit Penal. Ndërkohë, për veprat e tjera është ndarë procedimi penal.
Në vijim, Prokuroria pranë Gjykatës së Shkallës së Parë Juridiksionit të Përgjithshëm Fier, shpreh angazhimin e plotë për hetimin e shpejtë dhe vënien para përgjegjësisë ligjore të personave që kryejnë vepra penale që cënojnë apo dëmtojnë mirëqënien dhe zhvillimin normal të të miturve”.
