TIRANË– Detaje të reja kanë dalë në dritë në lidhje me 48-vjeçaren Shpresa Cani, e cila ndërroi jetë ditën e djeshme brenda ambienteve të bashkisë Lushnje. Duke folur për mediat tezet e të ndjerës u shprehen se ajo prej kohësh vuante nga talasemia dhe merrte gjak.
“Vajtëm në Lushnje e gjetën të vdekur. Vetëm shkoi atje ajo. Qe vdekje e papritur o bir, u nis me këmbët e veta dhe erdhi me arkivol. Do bënte letrat e pensionit. Nuk e di tezja e bir. Vuante nga anemia. Ishte anemike. Kishte probleme, merrte gjak. Ishte talesemike. Ka kohë që ishte sëmurë. Nuk rrinte dhe aq sëmurë, merrte gjak. Kur u tha që vdiq atje u habitëm,”-thanë për mediat tezet e të ndjerës.
Shpresa Cani ndërroi jetë ditën e djeshme në zyrën e kryebashkiakes së Lushnjes Emirjeta Sefa. Ajo kishte shkuar pranë bashkisë për të kërkuar që ti rilidhnin ndihmën ekonomike pasi jetonte vetëm me babain pasi ishte beqare dhe nuk ia dilnin dot. Pas vajtjes në zyrën e informacionit ajo është drejtuar në Drejtorinë e Ndihmës Ekonomike në bashki ku mësohet se ka pasur një debat të fortë me punonjesen. Pas debatit ajo ka kërkuar një takim me kryetaren Emirjeta Sefa dhe në këtë moment është ndjerë keq dhe ka humbur ndjenjat. Dyshohet se Cani ka kaluar atak kardiak. Në deklaratën e saj bashkia e Lushnjes shprehet se Sefa dhe 48-vjeçarja kishin rënë dakort që në janar të trajtohej me fundin e bashkisë me ndihmë ekonomike.
