SHKODËR- Një ngjarje e rëndë është regjistruar në orët e para të mëngjesit në fshatin Bardhaj të Njësisë Administrative Rrethina në Shkodër. Raportohet se një sasi tritoli është vendosur në shtëpinë e oficerit të patrullës Valter Serra.
Lënda eksplozive është hedhur në oborr. Në njoftimin e saj policia bën me dije se për pasojë është dëmtuar një makinë “Wolswagen” e parkuar aty.
Mbetet e paqartë arsyeja e këtij sulmi, mirëpo dyshohet se ngjarja ka të bëjë me detyrën që mban Serra. Grupi hetimor ka mbërritur në vendin e ngjarjes dhe po punon për zbardhjen e saj.
NJOFTIMI I POLICISË:
Më datë 30.12.2022, rreth orës 02:00, në fshatin Bardhaj, ka shpërthyer një sasi lënde plasëse, para banesës së shtetasit V. S., me detyrë punonjës i Patrullës së Përgjithshme të Komisariatit të Policisë Shkodër. Si pasojë është dëmtuar automjeti tip “Volksëagen” në pronësi të këtij shtetasi dhe janë shkaktuar dëmtime të lehta në banesën e tij. Grupi hetimor, nën drejtimin e Prokurorisë pranë Gjykatës së Rrethit Gjyqësor Shkodër, vijon punën për zbardhjen e rrethanave të kësaj ngjarjeje. Grupi i posaçëm hetimor i ngritur për zbardhjen e kësaj ngjarjeje, nga veprimet e para hetimore, ka siguruar prova që do të çojnë në identifikimin dhe kapjen e autorit/ëve.
