ELBASAN– Një ngjarje e rëndë raportohet të ketë ndodhur mbrëmjen e djeshme në vendin e quajtur “Harqet” në Elbasan. Bëhet me dije se një 35-vjeçar i identifikuar me inicialet F.M është paraqitur i plagosur në urgjencën e spitalit të Elbasanit.
I plagosur u ka thënë bluzave të bardha se është plagosur me një shufër hekuri pas një incidenti kur kishte rënë nga motori. Por kjo nuk i ka bindur bluzat e bardha, të cilët kanë lajmëruar Policinë.
Ngjarja mbetet ende mister. Nuk dihet se kush është autoru dhe rrethanat në të cilat ndodhi plagosja. Ndërkohë dhe dy sholët e tij të identifikuar me inicialet Sh. H., 33 vjeç dhe M. G., 30 vjeç, janë arrestuar pasi nuk kanë treguar detaje në lidhje me ngjarjen.
NJOFTIMI I POLICISË:
Shkoi për mjekim në spital, i dëmtuar në këmbë, dyshohet me armë zjarri, dhe nuk tregoi rrethanat e ngjarjes, arrestohet në flagrancë nga Policia. Në pranga edhe 2 shtetas të tjerë (shokët e tij), për moskallëzim krimi. Specialistët për Hetimin e Krimeve të Komisariatit të Policisë Elbasan arrestuan në flagrancë shtetasit: F. M., 35 vjeç, Sh. H., 33 vjeç dhe M. G., 30 vjeç, të tre banues në lagjen “5 Maji”, Elbasan. Më datë 30.12.2022, rreth orës 21:30, ka shkuar për mjekim në spitalin rajonal të Elbasanit, shtetasi F. M., me një plagë në këmbë, e dyshuar e shkaktuar nga një armë zjarri. Pasi ka marrë mjekim, ky shtetas ka dalë nga spitali. Gjatë marrjes në pyetje nga grupi hetimor, shtetasi F. M. ka deklaruar se ishte dëmtuar me një hekur, pasi ishte rrëzuar nga motori, në vendin e quajtur “Harqet”. Shërbimet e Policisë kanë shoqëruar edhe shtetasit Sh. H. dhe M. G., shokë të shtetasit F. M., të cilët gjatë marrjes në pyetje nuk kanë treguar rrethanat e vërteta të ngjarjes. Grupi hetimor nuk ka gjetur asnjë send të kundraligjshëm, gjatë kontrollit në vendin e ngjarjes të pretenduar nga 35-vjeçari. Nën drejtimin e Prokurorisë pranë Gjykatës së Rrethit Gjyqësor Elbasan vijon puna për zbardhjen e rrethanave të ngjarjes, identifikimin dhe kapjen e personave të përfshirë në këtë ngjarje. Materialet i kaluan Prokurorisë pranë Gjykatës së Shkallës së Parë Elbasan, për veprat penale “Moskallëzimi krimit” dhe “Veprime që pengojnë zbulimin e të vërtetës”.
