‘Sunny Hill Festival’ nis sot te Liqeni Artificial/ Ja rregullat që duhet të zbatoni për pjesëmarrje në festival
Ditën e sotme nis ‘Sunny Hill Festival’ në Tiranë që do të zgjasë për tre ditë rresht, me datë 26, 27 dhe 28 gusht.
Festivali i cili mbahet te Liqeni Artificial i Tiranës, do të pres emra të mëdhenj që do të ngjiten në skenën e Sunny Hill Tirana, në edicionin e parë të këtij eventi muzikor në Shqipëri.
40 yjet e muzikës do të performojnë për tre natë rresht të ftuar nga këngëtarja me famë botërore, Dua Lipa.
Action Bronson, reperi i famshëm italian Fedez, Tananai por dhe artistë shqiptarë si Dren Abazi e Dafina Zeqiri do të jenë të parët që do të startojnë festivalin.
Ndërkohë, në ditën e dytë të festivalit do të performojnë vetëm DJ të njohur botëror, ndërsa dita e tretë e festivali do të hapet nga reperi i njohur Stormzy, ndjekur nga Mc Kresha & Lyrical Son & Ledri Vula, Mozzik & Getinjo dhe Elgit Doda.
Ndërkohë, teksa kanë mbetur edhe pak orë nga nisja e Sunny Hill Festival Tirana 2022, gjithçka është pothuajse gati.
Organizatorët e festivalit kanë publikuar disa nga rregullat që duhet të ndjekin të gjithë pjesëmarrësit në këtë festival. Të gjithë ata që tashmë kanë siguruar një biletë, duhet të marrin me vete kartën ID dhe Biletën, ndërsa nuk duhet të marrin me vete mjete të ndaluara.
Bileta e blerë është e vlefshme për të trija netët. Bileta ka një kod skanimi dhe më pas pjesëmarrësve i jepet një byzylyk për të vendosur në dorë, i cili nuk duhet të dëmtohet.
Mosha minimale për të ndjekur festivalin vetëm është 16-vjeç. Të rinjtë nën moshën 16-vjeç duhet të jenë të shoqëruar nga të rriturit. Nga ana tjetër duhet të keni me patjetër me vete kartën e ID për tu futur brenda në festival.
Në festival nuk paguhet me Cash, por pagesat për pijet dhe ushqimin bëhen përmes aplikacionit Sunny Hill.
Më herët ky organizim madhështor u zhvillua edhe në kryeqytetin e Kosovës, pjesë e së cilit ishin rreth 100 mijë pjesëmarrës.
