TIRANË– Pamjet që shihni në foto janë gjithçka ka mbetur pas aksidentit tragjik në aksin Bulqizë-Maqallarë në vendin e quajtur “Ura e Gjoricës” që la pas një bilanc tragjik me tre të vdekur dhe katër të plagosur. Siç shihet edhe në foto aksidenti ka qenë aq i fortë sa mjeti ku udhëtonin viktimat dhe një nga të plagosurat është bërë ndarë në dysh. Raportohet se mjeti me targa angleze ku udhëtonin të plagosurit e tjerë Mërgim dhe Edison Lazri e Kadrie Markeçi e ka tërhequr zvarrë për rreth 100 metra “Benzin” 240, duke bërë që mjeti të shpërbëhej dhe pamjet flasin vetë.
Autoambulancat mbërriten menjëherë në vendin e ngjarjes por shpëtimi i dy vëllezërve Kujtim e Murat Istrefi bashkë me bashkëshorten e njërit prej tyre Lulzime Istrefi ishte i pamundur. Vëllezërit kishin ndërruar jetë në vend ndërsa Lulzime Istrefi vdiq rrugës për në spitalin e Dibrës. Nxjerrja e trupave nga makina ka qenë e vështirë për shkak të shtypjes së makinës duke bërë që për pak kohë trupat e tyre të qëndronin varur në mjet derisa ndërhynë ekipet e zjarrfikëses.
Katër të plagosurit ndodhën jashtë rrezikut për jetën ndërsa dy prej tyre Mërgim dhe Edison Lazri janë nisur për trajtim më të specializuar në spitalin e Traumës për shkak të frakturave të shumta. Firuze Istrefi, e cila humbi dhe bashkëshortin e ka kaluar rrezikun për jetën dhe ndodhet në gjendje të stabilizuar. Aksi ku ndodhi aksidenti është një nga akset më problematike të zonës së Dibrës, natën e ndërrimit të viteve një 24-vjeçar humbi jetën pasi ra në humnerë.
