Europa kërkon shpëtim në Katar për krizën energjitike

Presidenti i Këshillit Evropian, Charles Michel, do të zhvillojë bisedime me prodhuesin kryesor të gazit për krizën energjetike të Evropës gjatë një vizite në Doha.

Michel pritet të vizitojë Katarin të martën, sipas planit të tij zyrtar.

Qeveritë evropiane kanë kërkuar alternativa ndaj gazit nga furnizuesi kryesor Rusia, që nga ndërhyrja ushtarake ruse në Ukrainë në fund të shkurtit, kur nisi rritja e kostove të energjisë për Evropën pasu flukset ruse u reduktuan.

KatarEnergy në pronësi të shtetit, një nga eksportuesit kryesorë të gazit natyror në botë, ka negociuar me disa blerës evropianë për muaj të tërë, por nuk ka ende asnjë marrëveshje konkrete.

“Charles Michel do të takohet me disa zyrtarë të nivelit të lartë për të diskutuar dhe shqyrtuar çështjet rajonale dhe ndërkombëtare, duke përfshirë krizën Rusi-Ukrainë, krizën e energjisë, si dhe një sërë çështjesh të tjera si Afganistani, Irani dhe Palestina-Izraeli”, tha një zyrtar i Katarit për Reuters.

Udhëheqësit evropianë prej kohësh po përpiqen të menaxhojnë çmimet në rritje të gazit, ndërsa frika për mungesën e tij sa vjen e shtohet me afrimin e dimrit. Rusia ka njoftuar planet për të mbajtur tubacionin e saj kryesor të gazit në Evropë të mbyllur. Dihet që 40% e gazit me të cilin furnizohet Europa është rus.

Shumica e vëllimeve aktuale të gazit natyror të Katarit janë të lidhura me kontrata afatgjata, kryesisht me blerësit në Azi, të cilat Katari ka thënë se do t’i respektojë.

Megjithatë, QatarEnergy mund të fillojë të furnizojë Gjermaninë me gaz nga uzina e gazit natyror Golden Pass në Teksas, në të cilën zotëron shumicën e aksioneve, që në vitin 2024, tha zëvendëskryeministri i Katarit për një gazetë gjermane në maj.

Për më tepër, Katari po kërkon klientë të rinj për një zgjerim të madh të prodhimit të tij të gazit, i cili do të rrisë eksportet e tij me rreth 63%.