MAMURRAS– Banorët e lagjes “Demokracia” në Mamurras janë ngritur në protestë ditën e sotme. Ata protestojnë kundër mjeteve të tonazhit të rëndë të firmave të ndërtimit, të cilat kalojnë në mes të lagjes. Sipas banorëve mjetet që kalojnë aty nuk janë vetëm shqetësim për banorët, por kanë filluar të dëmtojnë dhe asfaltin që kalon përmes lagjes.
“Duam të na hiqen makinat e trajlerat që kalojnë këtu. Përditë këtu do jemi. Ose këtu ose me vdek krejt”, shprehet një zonjë e moshuar. Nuk është vetëm një problematikë por janë disa për shkak të kamionëve që kalojnë. Tonazhi i rëndë i mjeteve ka shkaktuar dëmtime të rrugës sepse një fragment i rrugës është i shtruar dhe po demtohet pjesa tjetër që është e shtruar me çakull, me inerte pasi nuk ka kanalizim dhe mbulohet nga balta”, thotë një banor.
Banorët shprehen se kjo problematike vijon prej vitesh dhe kërkesat e tyre kanë rënë në vesh të shurdhët. Sipas tyre makinat jo vetëm që krijojnë një plurur të rëndë por janë kthyer në rrezik dhe për fëmijët e lagjes. Ata kanë kërkuar një zgjidhje të menjëhershme për këtë situatë ku ndodhen.
“Jemi mbledhur sot pasi rruga është bërë jashtëzakonisht e vështirë për banorët. Jo vetëm dimrit që është balta deri në gju, por edhe gjatë verës me pluhur dhe zhurma. Ne këtu afër kemi dhe shkollën dhe të gjithë fëmijët e shkollës ju rrezikohet jeta nga kalimi i kamionëve të tonazhit të rëndë.
Banorët shprehen se protestat e tyre nuk do të ndalen deri në realizimin e kërkesën së tyre. Madje ata paralajmërojnë dhe përshkallëzim të situatës nëse nuk u jepet zgjidhje.
