TIRANË-Detaje të reja kanë në dritë nga vrasja e biznesmenit Edmond Papa në zonën e Selitës vitin e shkuar. Kështu bëhet e ditur se në ngjarje ka qenë i përfshirë dhe një person i tretë që dyshohet se ka qenë “syri” i operacionit dhe ai që ka ndjekur këmba-këmbës viktimën. Sipas të dhënave nga grupi hetimor, personi i tretë i paidentifikuar ka qenë aktiv ditën e vrasjes pasi ka qenë ai që ka informuar dy të tjerët se ku ishte dhe ku po lëvizte shënjestra e tyre. Ndërkohë dyshohet se ai ka koordinuar dhe Albano Velon me Andreë Boden të cilat ishin në krah të ndryshëm të rrugëve.
Ndërkohë që vetë mbante në vëzhgim banesën dhe familjarët e biznesmenit nga Saranda. Nga analizimi i imazheve të kamerave është dalluar Andrew Bode me xhinse blu, xhup të zi, dhe atlete me gomë të bardhë, në momentin që kryen vrasjen e ndërsa rrëth 3 orë më vonë një kamera e ka fiksuar atë më një kostum të kuq në zonën e Astirit, shkruan “Ora News”.
Deri më tani në lidhje me atentatin ndaj Papës është arrestuar vetëm Albano Velo ndërsa në kërkim është shpallur Andrew Bode, që dyshohet të jetë ai që ka ekzekutuar Edmond Papën brenda në lokal me 9 plumba. Velo u arrestua në aeroportin e Rinasit kur po kthehej nga Franca, pasi kishte ikur për të fshirë gjurmët dhe lidhjen e tij me vrasjen. Po ashtu nën hetim është vënë dhe babai i tij Dilaver Velo, efektiv i lartë në Policinë e Shtetit derisa me urdhër të kryepolicit Muhamet Rrumbullaku u përjashtua nga unifotmat blu. Ai do të hetohet nëse ka pasur lidhje në largimin e të birirt nga vendi dhe nëse ka pasur dijeni për ngjarjen e rëndë.
Ndërkohë bëhet e ditur që makina tip “Audi” që u përdor nga dy autorët Albano Velo dhe Andrew alias Edvin Bode për vrasjes e Edmond Papës, nuk rezulton të jetë i vjedhur. Rezulton se targat e huaja të këtij mjeti janë të mbivendosura dhe nuk kanë qenë të “Audi-t”, por të një mjeti tjetër.
Deri më tani dyshohet se vrasja e biznesmenit Edmond Papa të ketë ardhur si pasojë e prishjes së pazareve të drogës ndërkohë po hetohet dhe pista e hakmarrjes pasi dy autorët rezultojnë të jenë miq të ngushtë të Aleksandër Sadikajt të riut që u ekzekutua rreth 6 muaj më parë në rrethrrotullimin e TEG-ut me një bombë të telekomanduar që shpërtheu kur ai drejtonte makinën në autostradë. Po ashtu dyshohet se Papa dhe Sadikaj janë takuar tre ditë para se ky i fundit të vritej.
