TIRANË– Nëntë persona kanë rënë në prangat e policisë së Tiranës pasi akuzohen për vepra të ndryshme penale. Kështu në njoftimin e bërë publik blutë e kryeqytetit bëjnë me dije se një 18-vjeçar u vu në pranga pasi lëvizte me armë të ftohta me vete. Gjatë kontrollit fizik të bërë ndaj tij u konstatuan se në çantë mbante dy përforcues grushti dhe një shufer metalike. Ndërkohë dy të rinj u ndaluan pasi pas kontrollit të bërë në makinën e tyre efektivët konstatuan një sasi të vogël lënde narkotike të llojit kokainë. Ndërsa 5 të tjerë u vunë në pranga pasi u kapën në flagrancë duke drejtuar automjetin në gjendje të dehur.
NJOFTIMI I POLICISË:
Specialistët e Seksionit për Hetimin e Narkotikëve arrestuan shtetasit R. K., 33 vjeç dhe B. K., 23 vjeç, të dy banues në Tiranë, pasi gjatë kontrolleve fizike të ushtruara nga shërbimet e Policisë, iu gjetën dhe iu sekuestruan në cilësinë e provës materiale, sasi të vogla lënde të dyshuar narkotike kokainë.
Specialistët e Seksionit për Hetimin e Krimeve Ekonomiko-Financiare ndaluan shtetasin Shukri Daku, 28 vjeç, banues në Kamzë, pasi Gjykata e Rrethit Gjyqësor Tiranë, e ka dënuar me 8 muaj burgim, për veprat penale “Falsifikimi i dokumenteve” dhe “Falsifikimi i letërnjoftimeve, pasaportave ose i vizave”.
Specialistët për Hetimin e Krimeve të Komisariatit të Policisë Nr. 3 arrestuan shtetasin R. F., 18 vjeç, banues në Tiranë, pasi gjatë kontrollit të ushtruar nga shërbimet e Policisë, në çantën e 18-vjeçarit, u gjetën dhe u sekuestruan, 2 doreza (përforcues grushti) dhe 1 shufër metalike.
Specialistët e Qarkullimit Rrugor arrestuan shtetasit:
– A. Ç., 43 vjeç, B. Xh., 22 vjeç, E. Xh., 40 vjeç, J. S., 33 vjeç dhe I. D., 43 vjeç, të pestë banues në Tiranë, pasi u kapën duke drejtuar automjetet përkatëse, në gjendje të dehur.
Në Komisariatin e Policisë Nr. 3 është paraqitur dhe ka kallëzuar një shtetase 40-vjeçare, banuese në Tiranë, se ditën e djeshme është larguar nga banesa vajza e saj, 19 vjeçe. Punohet për gjetjen e saj.
Materialet procedurale i kaluan Prokurorisë, për veprime të mëtejshme.
