DIBËR– Një incident i rëndë është shënuar mesditën e sotme në aksin rrugor Maqallarë-Peshkopi. Raportohet se një mjet i tonazhit të rëndë kishte pësuar difekt duke bllokuar qarkullimin. Në këtë moment oficeri i policisë rrugore Tonin Tosku ka shkuar për të rregulluar trafikun e krijuar. Në këtë moment ka plasur një nga gomat e kamionit duke plagosur rëndë Toskun. Oficerit i janë dëmtuar rëndë të dyja këmbët dhe ndodhet në gjendje kritike për jetën. Sipas njoftimit të Policisë po pritet helikopteri i Ministrisë së Shëndetësisë për të bërë transportin e tij drejt Tiranës.
NJOFTIMI I POLICISË:
Dibër/informacion paraprak Rreth orës 14.00, në vendin e quajtur ‘Qenok’, aksi rrugor Maqellarë-Peshkopi, një mjet i tonazhit të rëndë kamion ka pësuar defekt duke bllokuar aksin rrugor. Menjëherë patrulla e Policisë Rrugore ka shkuar në vendin e ngjarjes me qëllim menaxhimin dhe hapjen e trafikut për automjetet. Gjatë momentit që punonjësi i Policisë Rrugore po rregullonte trafikun, ka plasur njëra nga gomat e kamionit dhe është lënduar rëndë punonjësi i policisë rrugore shtetasi T.T. Punonjësi i Policisë është dërguar në spital dhe ndodhet në gjendje të rëndë shëndetësore pasi ka dëmtuar të dy këmbët. Grupi hetimor nën drejtimin e Prokurorisë ndodhet në vendngjarje. Pritet helikopteri i Ministrisë së Shëndetësisë për të transportuar punonjësin e Policisë drejt Tiranës për ndihmë mjekësore më të specializuar.
