Bërnabiç mbërrin në Mitrovicë, qindra serbë e presin me pankarta

Kryeministrja e Serbisë, Ana Bërnabiç ka mbërritur në Mitrovicën e Veriut, e shoqëruar nga drejtori i të ashtuquajturës zyrë për Kosovën në qeverinë serbe, Petar Petkoviç.

Për ta pritur kryeministren serbe u mblodhën një numër i serbëve.

Bërnabiqit ia bënë një rresht pritjeje përfaqësuesit e Listës Serbe me në krye Goran Rakiç.

Atmosfera është festive dhe në mesin e të shumtëve të mbledhur janë edhe përfaqësues politikë të serbëve. Gjithashtu është shtuar dukshëm prania e policisë, raporton Blici serb.

“Serbët e Kosovës gjithmonë prapa shtetit të Serbisë dhe kryeministres së tyre”, ishte një nga pankartat që serbët i mbanin në duar.

“Derisa e kemi presidentin e Serbisë, Aleksandar Vuçiç dhe Anën tonë, ne nuk i druhemi asgjëje”, ishte një tjetër nga pankartat.

Kjo është vizita e parë e Bërnabiç në Kosovë prej se është zgjedhur kryetare e Qeverisë serbe, në vitin 2017.

Gjatë qëndrimit njëditor, ajo do të vizitojë komunat në veri të Kosovës, Mitrovicë e Veriut, Zveçan dhe Leposaviq – ku popullata shumicë është serbe.