SHKODËR– Detaje të reja janë zbardhur në lidhje me ngjarjen horror në Shkodër ku 32-vjeçarja Orjana Gremi hodhi foshnjën e saj 1-javëshë në lumin Kir. Drejtori i Maternitetit të Shkodrës , Senad Halluni ka folur para mediave ku ka treguar dhe historikun e qëndrimit të të resë në spital. Ai u shpreh se ajo nuk kishte probleme të shëndetit mendor ndërsa shtoi se 32-vjeçarja kishte refuzuar të shkruante emrin e atësisë në certifikatën e lindjes.
Senad Halluni: Ky është rast atipik për shoqërinë tonë. Sa i takon shërbimit të maternitetit Shkodër, unë mund t’ju shpjegoj që zonja ka ardhur në datën 30, është shtruar, ka qenë lindja e parë për të. Në pranim është një filtër që ne regjistrojmë atësinë e fëmijës. Zonja ka refuzuar ta shkruajë atësinë e fëmijës dhe që këtu ka filluar vëzhgimi më i mbyllur rreth saj. Ne kemi protokoll për këtë proces që sigurisht kryesorja është mosneglizhenca nga ana mjekësore, pastaj zonja ka refuzuar dhe ka shprehur dëshirën që të fillojnë procedurat për ta dorëzuar në shtëpinë e foshnjes 0-6 vjeç. Duke qenë se ishte data 31 dhjetor, ne njoftuam drejtorinë e shtëpisë së foshnjes që të nisnin procedurat. Në këtë moment futet në ndjekje të afërt nga psikologia, e cila ka kryer procedurën standard, një vlerësim të gjendjes psikologjike e sociale të zonjës që është dokumentuar në kartelën klinike. Më 31 dhe 1 kam qenë vetë mjek në shërbimin 24 orë dhe mesa kemi mundur të festojmë për vete, jemi mundur dhe për zonjën e të tjerë që ishin në maternitet t’i gëzonim. Zonja ka punuar në një ndërmarrje të këpucëve në Shkodër dhe disa shoqe të saj erdhën për ta parë duke i sjellë rroba, dhurata, bashkë me personelin. Me datën 1,2,3 ka qenë pushim dhe me datën 4 kanë nisur procedurat për t’u transferuar beben në shtëpinë e foshnjes. Në datë 4, ajo ka refuzuar që ta dorëzojë dhe sipas protokollit që kemi, ka nënshkruar një deklaratë që marr përsipër marrjen e fëmijës në gjendje normale dhe në kushtet e një vlerësimi që është bërë nga psikologia që ka qenë në normalitet. Është dorëzuar fëmija dhe zonja, ka dalë nga materniteti dhe nga ky moment, me ne, nuk ka pasur më kontakt. E morëm vesh mbrëmë që dje ajo kishte kryer një akt të tillë. Nuk ka probleme të shëndetit mendor. Ajo ka qenë vetëm gjithë kohën, nuk ka ardhur asnjë nga familjarët e saj. Kemi pyetur në gjendjen civile, na rezultoi se ishte e vetme, jeton në Golem.
Ngjarja e rëndë ka tronditur mbarë opinion publik ditën e sotme. 32-vjeçarja Orjana Grami pasi e kishte mbështjellë të birin me batanije dhe plasmas e ka hedhur në ujërat e lumit Kir, ku foshnja gjeti dhe vdekjen. Ai u gjet ditën e sotme nga efektivët e policisë ndërkohë që Grami ka thënë para bluve të Shkodrës se e kishte kryer veprimin pasi nuk kishte se mese të mbante fëmijën.
