TIRANË– Detaje të reja dalin nga “vjedhja e vitit” në shtëpinë e ish-shefes së kabinetit të ish-ministrit Arben Ahmetaj, Alda Klosi. Kështu djali i pastrueses Rozeta Dobi, e cila ishte dhe ideatorja e vjedhjes së 120 mijë eurove, Havieri për të justifikuar makinat e shtrenjta u thoshte shokëve se i ka të marra me qira.
Dy nga 3 makinat e tyre, rezultojnë se janë të blera nga paratë e vjedhura në këto banesa, në një hark kohorë prej rreth 4 vitesh, pasi banesa e Klosit nuk ishte e vetmja. Ndërkohë nënë e bir kanë pranuar krimin e kryer para uniformave blu.
Vjedhja ka ndodhur më datë 15 dhjetor kur në shtëpi nuk ndodhej askush. Rozeta Dobi punonte si pastruese në shtëpinë e ish-zyrtares së lartë në Ministrinë e Financave Alda Klosi. Paratë janë vjedhur në kohë të ndryshme. Pasi kishin kryer grabitjen e fundit Dobi dhe i biri Havier Dobi e kthyen shtëpinë “përmbys” për ta bërë të dukej si grabitje. Pas kontrollit në shtëpi atyre iu gjetën dhe 404 mijë dollarë të tjerë, mijëra euro dhe bizhuteri, të cilat ishin fshehur në tubin e aspirimit. Rozeta e Havier Dobi e pranuan krimin para uniformave blu. Havieri me paratë e vjedhura kishte blerë makina luksi, të cilat i ekspozonte në rrjetet sociale.
