TIRANË– Familjarët e Enver Sheshit, 59-vjeçarit, cili ndërroi jetë në QSUT, do bëjnë kallëzim penal për vrasje me dashje për prokurorët dhe gjyqtarët e Gjykatës së Posaçme. Kjo pasi Sheshi kishte bërë disa herë kërkesë për të ndryshuar masën e sigurisë arrest me burg për shkak të probleme shëndetësore.
Sheshi, ndodhej në burgun 313 dhe mendohet se si pasojë e infarktit, ndërroi jetë një orë pasi mbërriti në urgjencën e QSUT. Ndërkohë Report Tv shkruan se avokatja e Sheshit ka kërkuar ndryshim të masës së sigurisë jo për probleme shëndetësore të Sheshit, por sepse më herët 59- vjeçari ka qenë i dënuar për të njëjtën çështje. Sipas dokumentit të siguruar nga ReportTv sqarohet se duke qenë se është dënuar më herët për këtë çështje nuk mund të vuajë të njëjtin dënim. Sipas vendimit, vetëm dy të pandehur kanë ankimuar vendimin e Gjykatës, për probleme shëndetësore.
Enver Sheshi, 59 vjeç ishte arrestuar më 16 nëntor për inceneratorin e Fierit së bashku me 10 persona të tjerë mes tyre edhe biznesmeni Arben Dervishaj. Enver Sheshi ishte administrator i kompanisë ‘Leli-17’ sh.p.k. Ai akuzohej për veprën penale “Krijimi i skemave mashtruese në lidhje me tatimin mbi vlerën e shtuar”, në bashkëpunim.
