TIRANË– Spartak Dobi, burri i pastrueses Rozeta Dobi, e cila bashkë me të birin ka vjedhur 120 mijë euro në shtëpinë e ish-zyrtares së lartë në Kryeministri ka folur për herë të parë për mediat. Në një rrëfim për emisionin “Review” në Euronews Albania, Spartak Dobi shprehet me lot në sy se ai nuk ishte në dijeni për veprimet që bënte gruaja dhe nuk e dinte për vjedhjet dhe paratë që ndodheshin në shtëpi.
Spartak Dobi: Nuk kam pasur dijeni për ngjarjen e as nuk dua të kem. Kam 25 vite me të. Kam dy kalamaj me të. Gocën e kam shtatzënë po qan. Djali nuk kishte pse të futej në këtë ngjarje. Policia ka ardhur pardje. Policia i gjeti dje paratë, unë nuk kam ditur gjë. Unë marrë pension të mirë. Kam punuar vet polic.
Vjedhja ka ndodhur më datë 15 dhjetor kur në shtëpi nuk ndodhej askush. Rozeta Dobi punonte si pastruese në shtëpinë e ish-zyrtares së lartë në Kryeministri Alda Klosi. Paratë janë vjedhur në kohë të ndryshme. Pasi kishin kryer grabitjen e fundit Dobi dhe i biri Havier Dobi e kthyen shtëpinë “përmbys” për ta bërë të dukej si grabitje. Pas kontrollit në shtëpi atyre iu gjetën dhe 404 mijë dollarë të tjerë, mijëra euro dhe bizhuteri, të cilat ishin fshehur në tubin e aspirimit. Rozeta e Havier Dobi e pranuan krimin para uniformave blu. Havieri me paratë e vjedhura kishte blerë makina luksi, të cilat i ekspozonte në rrjetet sociale.
