TIRANË– Tragjedia e Gërdecit ka rikthyer dhe njëherë në dyert e Prokurorisë së Posaçme ish-ministrin e Mbrojtjes Fatmir Mediu, këtë herë i marrë zyrtarisht nën akuzë nga SPAK. Pas 60 minutash marrje në pyetje Mediu tha para mediave se ai është i pafajshëm dhe se prokurorët nuk paraqiten asnjë provë të re përveçse ato të viti 2009. Ai shprehet se e gjithë kjo që po ndodh po bëhet me motivacione politike.
Fatmir Mediu: Dua t’ju bëj me dije që më është prezantuar i njëjti fashikull, e njëjta akuzë si në 2009, pa shtuar asnjë dokument dhe as provë shtesë, akuzë për shpërdorim detyre, kam kërkuar që të pyetem, nuk jam pyetur asnjëherë. Shpresoj që të merrem në pyetje. Motivi politik është në akuzë, nuk është urdhri i ministrit që ka provuar problemin, çdo letër që kam nxjerrë ka ardhur nga pjesa civile dhe ushtarake. Akuzën nuk e pranoj, jam i pafajshëm, demontimi është çështje sigurie kombëtare, kam si çdo qytetar, të pyetem për aktet e mia, nuk jam pyetur asnjëherë.
Sipas SPAK, Mediu ka shkelur ligjin kur ishte ministër i Mbrojtjes duke shpërdoruar detyrën, veprime të cilat sollën tragjedinë e Gërdecit, ku humbën jetën 26 persona dhe shumë të tjerë i plagosën. Ky është përfundimi që ka arritur pas hetimit disa mujor, Prokuroria e Posaçme (SPAK) për ish ministrin e Mbrojtjes. Ish-ministri si një nga ish-zyrtarët përgjegjës për tragjedinë e Gërdecit. Apeli i GJKKO vendosi hapjen e çështjes duke marrë të pandehur ish-ministrin. Ndërkohë Mediu ka dorëzuar rekursin në Gjykatën e Lartë ku kundërshton vendimin e Gjykatës së Apelit të Posaçëm duke pretenduar se vendimi i Apelit është antikushtetues.
