TIRANË– Deputetja e Partisë Demokratike Flutura Açka ka reaguar ashpër në lidhje me vendimin e një pjese të deputetëve që mbështesin Enkelejd Alibeaj që përjashtuan ditën e sotme zytrtarisht nga Grupi Parlamentar katër deputetët, Oerd Bylykbashi, Tritan Shehu, Agron Shehaj dhe Belind Këlliçin. Në një postim në Facebook Açka e cilëson këtë vendim si një marrëzi teksa shtron dhe një pyetje për kolegët në atë mbledhje. ” A jeni në metro?.
Në njoftimin e bërë publik për mediat grupi i deputetëve që mbështesin Enkelejd Alibeajn kanë përjashtuar zyrtarisht nga Grupi Parlamentar katër kolegët e tyre, Oerd Bylykbashin, Tritan Shehun, Agron Shehajn dhe Belind Këlliçin. Sipas tyre ditën e sotme është mbushur afati prej 1 viti që u ishte lënë në dispozicion për të reflektuar në lidhje me ato që grupi i Alibejat i cilëson si akte dhune të frymëzuara nga Sali Berisha më 8 dhjetor në selinë e PD. 8 dhjetori ishte një nga ditët më të vështira për demokratët dhe Partinë Demokratike. Sali Berisha, i cili kishte nisur aksionin e tij politik për të rrëzuar nga posti i kryetarit Lulzim Bashën në ditën e rinisë mblodhi demokratët në selinë qëndrore për të marrë në dorëzim selinë e partisë, e cila ishte blinduar nga Lulzim Basha me dyer prej hekuri gjë që irritoi demokratët të cilët i shemben me ç’kishin në dorë. Në këtë moment ndërhyri policia dhe shpërndau turmën. Dy ditë pas ngjarjes, disa deputetë (përfshirë Berishën) u përjashtuan menjëherë, ndërsa katër deputetëve të përjashtuar sot iu kërkua distancim publik nga ngjarja.
