Takimi Meta-Berisha/ PD: Bashkëpunim në zgjedhjet vendore dhe protestat popullore
Partia Demokratike ka dalë me një njoftim për mediat mbi takimin e kryedemokratit Sali Berisha me drejtuesin e Partisë së Lirisë Ilir Meta.
PD bën me dije se në takim u ra dakord për bashkëpuim mes dy partive në zgjedhjet vendore si dhe protestat kundër Edi Ramës.
Ndër të tjera vihet në dukje që “takimi u karakterizua nga fryma e mirëkuptimit të plotë”.
Ky takim vjen pas aludimeve në media për konkurrencë lidershipi mes dy drejtuesve të partive më të mëdha opozitare.
Në njoftimin për media të selisë blu thuhet se:
Sot në Selinë e Partisë Demokratike u zhvillua një takim mes Kryetarit të Partisë Demokratike Sali Berisha dhe kryetarit të Partisë së Lirisë zotit Ilir Meta. Në këtë takim morën pjesë Sekretari i Përgjithshëm i Partisë Demokratike zoti Flamur Noka dhe deputeti i Partisë së Lirisë, Petrit Vasili. Në takim u diskutua dhe u ra plotësisht dakord për bashkëpunimin, bashkërendimin dhe Aleancën e Partisë Demokratike me Partinë e Lirisë në zgjedhjet vendore, inisiativat parlamentare, në protestat popullore kundër pushtetit të Edi Ramës. Takimi u karakterizua nga fryma e mirëkuptimit të plotë.
