TIRANË– Kryetari i Partisë Demokratike Sali Berisha e ka cilësuar si një akti kriminal elektoral darkën e kryeministrit Edi Rama me drejtorët e Policisë së Shtetit të 12 qarqeve të vendit të mbajtur disa ditë më parë në vilën qeveritare 31 në kryeqytet. Kreu i selisë blu u shpreh se ajo darkë kishte si qëllim shtrembërimin e vullnetit të votave të qytetarëve shqiptarë. Ndër të tjera ai shtoi se nuk ka zgjidhje tjetër përveçse revolucionit për të rrëzuar qeverinë.
Sali Berisha: Të gjitha këto do rrëzonin jo një, por tre qeveri. Por Rama kalon në heshtje sikur nuk ka ndodhur asgjë. Në vend të ndonjë dorëheqje, vazhdojnë mashtrimin çdo ditë ndaj qytetarëve. Atëherë fjala u takon qytetarëve. Nuk ka zgjidhje përveç një revolucioni për të përmbysur këtë regjim të pashembullt.
Edi Rama organizon darkën famëzezë me shefat e policisë në vend, në shkelje me çdo ligj dhe parim për policinë. Darka ishte një përpjekje e Edi Ramës për të shtrënguar radhët përpara stuhisë së revolucionit. Darka ishte një element kriminal elektoral. Pasi ai nuk ka ndërmend të veprojë ndryshe, përveçse të shkelmojë votën e shqiptarëve. Ftoj çdo demokrat të hapë një regjistër të veçantë për çdo shef komisariati dhe të regjistrojë çdo akt të tij. Një libër për krimet e Policisë së Shtetit. Udhëzimet e dhënë nga Edi Rama janë goditja e mëshirës për këtë institucion. Zgjidhjen e jep dhe do ta japë vetëm revolucioni demokratik. Qytetarë, ju e shihni vetë se kush qeveris dhe ku shkojnë taksat tuaja. U zbulua rastësisht se sa dyshekë janë të mbushur me euro, se sa arka të mbushura plot mund të jenë në Surrel. Kemi të bëjmë me një shpërthim të tmerrshëm të gjirizit të korrupsionit dhe vjedhjeve të kësaj qeverie.
