Salianji denoncon qeverinë për standarde të dyfishta: Jeni të pafuqishëm ndaj oligarkëve

Deputeti demokrat, Ervin Salianji, ka akuzuar qeverinë për padrejtësitë që bën ndaj qytetarëve të thjeshtë të vendit, duke favorizuar oligarkët që shkelin ligjin.

Në një deklaratë për mediet, Salianji, është shprehur se qeveria është e pafuqishme dhe e paaftë të ndalojë krimet dhe shkeljet e oligarkëve, ndërsa kur bëhet fjalë për disa litra naftë, qeveria tregon se si i arreston  qytetarët duke publikuar madje dhe emrat e tyre.

Diçka e tillë nuk ndodh me oligarkët që futin kontrabandë anije të tëra me naftë në Shqipëri.

Salianji akuzoi qeverinë për dy standarde, ndërsa pyeti nëse doganat shqiptare kanë dijeni për naftën kontrabandë.

“Në Shqipëri kemi dy standarde të përdorimit të ligjit. Sot ju paraqes se si qeveria është e pafuqishme përballë oligarkëve dhe tregon prepotencë ndaj qytetarëve. Qeveria tregon se si arreston disa dhjetëra litra naftë në Korçë. Policia e Shtetit tregohet e fortë me çdo shishe plastike që është kontrabandë në këtë vend dhe jep me emër dhe mbiemër personat që arreston. Por nuk ka të njëjtën zbatim ligji për oligarkët”, tha Salianji.

Ndër të tjera deputeti demokrat bëri me dije se ka paraqitur një shkresë në Ministrinë së Financave dhe Drejtorisë së Policisë së Shtetit për rastin në fjalë.