TIRANË– Kryetari i Partisë Demokratike Sali Berisha ka hedhur sot akuza dhe dyshime të forta në lidhjen me vdekjen e Enver Sheshit në burg. Sheshi ishte akuzuar dhe dënuar për inceneratorët. Në një deklaratë nga selia blu kryedemokrati tha se ai është vrarë për ti mbyllur gojën pasi kishte vendosur të fliste për atë që ai e quan afera e inceneratorëve.
Sali Berisha: Zhvillimet e ditëve të fundit faktojnë përfundimisht se ky është shteti i mafies, qeveria është mafia e shtetit. Jam këtu për të denoncuar edhe njëherë, errësirën me të cilën qeveria përpiqet të mbulojë vdekjen e të ndjerit Enver Sheshi, arrestuar për aferën e inceneratorëve. Menjëherë pas komunikatës zyrtare, e cila ngjallte më shumë dyshime se sqarime, një breshëri mesazhesh nga qytetarët vërshuan, të cilët shprehnin dyshime dhe bindje se i ndjeri Enver Sheshi është viktimë e mafies qeveritare të djegësave. Këto të dhëna, këto informata shtonin se Enver Sheshi, i arrestuar për një skemë të devijimit të parave të djegësve, kishte vendosur të fliste. Dhe pas kësaj, xhelati mafioz i kësaj afere të tmerrshme, e cila ka për kokë direkt, Edi Ramën, gjeti mënyrën sipas këtyre burimeve, ta çojë në botën tjetër, dëshmitarin e rrezikshëm.
