TIRANË– Vendin e lënë bosh në Kuvend nga Fatjon Veizaj, i cili dha dorëheqjen e ditën e sotme pritet ta zërë Gëzim Ademaj kandidati i radhitur i pesti në listat e Partisë Demokratike në zgjedhjet e 25 prillit. Ademaj vjen nga radhët e Partisë për Drejtësi Integrim dhe Unitet (PDIU). Sipas listës së kandidatëve për deputetë në zgjedhjet e 2021-shit mandati i kalon Ademajt. Nëse dhe ky nuk e pranon, sipas radhës i kalon Jolio Dines.
Fatjon Veizaj vendosi të heqë dorë ditën e sotme nga mandati i deputetit i fituar në zgjedhjet e 25 prillit. Në një postim në Facebook ai sqaronte dhe arsyen ku shprehej se e kishte marrë këtë vendim pasi përçarja në Partinë Demokratike sa vjen e shtohet. Veizaj e vë theksin tek lidershipi dhe deputetët, që sipas tij nuk po i përgjigjen interesit të demokratëve për ta bërë atë një forcë udhëheqëse, të respektueshme dhe fituese. Por dhe përjashtimet e fundit mesa duket kanë “vulosur” vendim e tij për tu larguar nga Kuvendi dhe grupi parlamentar i PD.
