POGRADEC -Një 35-vjeçar i identifikuar me inicialet A.G ka rënë në prangat e policisë së Pogradecit pasi u kap në flagrancë duke drejtuar mjetin në gjendje të dehur. Pas kontrollit fizik dhe në mjet të bërë nga blutë e Pogradecit atij iu gjet dhe një sasi e vogël lënde narkotike e llojit kanabis. Ndërkohë një 49-vjeçar i identifikuar me inicialet A.Q u arrestua pasi kërcënoi një person tjetër. Ndërsa një 35-vjeçar banues në fshatin Dardhas u arrestua pasi në gjendje të dehur ka ushtruar dhunë fizike ndaj bashkëshortes së tij.
NJOFTIMI I POLICISË:
Pogradec/Vihet në pranga 1 shtetas dhe procedohen në gjendje të lirë 2 të tjerë, për vepra të ndryshme penale.
Specialistët për Hetimin e Krimeve të Komisariatit të Policisë Pogradec arrestuan në flagrancë shtetasin A. G., 35 vjeç, banues në fshatin Pojan, Maliq, për veprat penale “Drejtimi i automjeteve në mënyrë të parregullt” dhe “Prodhimi dhe shitja e narkotikëve”. Ky shtetas është kapur nga shërbimet e Policisë, në lagjen nr. 1, Pogradec, duke drejtuar automjetin tip “Land Rover”, në gjendje të dehur. Nga kontrolli i ushtruar në këtë automjet, iu gjet dhe iu sekuestrua në cilësinë e provës materiale, një sasi e vogël lënde e dyshuar narkotike kanabis.
Po këta specialistë referuan materialet në Prokurori dhe filloi procedimi në gjendje të lirë për shtetasin A. Q., 49 vjeç, banues në Pogradec, për veprën penale “Kanosja”, pasi në lagjen nr. 4, Pogradec, ka kanosur me fjalë dhe me një send të fortë, një shtetas tjetër.
Gjithashtu u referuan materialet në Prokurori dhe filloi procedimi në gjendje të lirë për shtetasin E. H., 35 vjeç, banues në fshatin Dardhas, Pogradec, për veprën penale “Dhuna në familje”, pasi dyshohet se duke qenë në gjendje të dehur, ka ushtruar dhunë fizike ndaj bashkëshortes së tij. Ky shtetas është transportuar në spital, për trajtim mjekësor, pasi sipas deklarimeve të familjarëve, vuan nga epilepsia.
Materialet i kaluan Prokurorisë pranë Gjykatës së Rrethit Gjyqësor Pogradec, për veprime të mëtejshme.
