TIRANË– Deputeti i Partisë Socialiste Erion Braçe është treguar i ashpër në kritikat e tij ndaj qeverisë sa i përket paketave që u vijnë në ndihmë bujqëve. Duke folur në Komisionin e Ekonomisë deputeti socialist shprehet se shkak për vështirësitë e bujqve bëhen vonesat e pagesave nga grumbulluesit. Kjo sipas tij i çon bujqit në një zinxhir borxhesh nga të cilat nuk dalin dot më. Braçe tha se e gjithë sistemi ka nevojë për një riformatim pasi konkurenca e pandershme mes kompanive të grumbullimit është një problem serioz.
Erion Braçe: Kemi ligjin 48 të vitit 2014 aktualisht. Në vëzhgime, kompanitë e eksportit dhe kompanive të tjera, që nxjerrin eskport, apo që nxjerrin në treg, plotësojnë fatura, që nuk korrespondojnë me as me cilësinë, as çmimin…etj. Mallrat pa faturë nga bujku te kompanitë e grumbullimit, qarkullon pa faturë zyrtare të njohur nga autoritetet ligjore të vendit. S’ka faturë për mallin, gjen shkresa dore që u jepen bujkut në dorë për ët pritur kohën për të marrë paratë e tija. Nuk përcaktohet as pesha, as cilësia, as çmimi, ditën kur malli është dorëzuar. Ka vonesa të mëdha që shkojnë jo me javë por me muaj të tërë për pagesat e bujkut dhe mbi të gjitha një situatë e tërë mashtrimi për bujkun. Kur nuk i reflektohet sasia e madhe, as cilësia dhe çmimi në ditën e shitjes së produktit, kjo ka sjellë vështirësi me bujkun prodhues. Mungesa e parave bën që bujku të hyjë në zinxhir borxhi. Një tjetër element shqetësues është konkurrenca e kompanive të grumbullimit. Tregu është deformuar në mënyrë të hapur. Ka grumbullues shumë të mëdhenj që vijojnë të punojnë me prodhimin e bujkut ashtu siç ka kompani të tjera që punojnë me lekë në dorë dhe janë vështirësi nga një konkurrencë e pandershme. Të tjerët vendosin çmime normale tregu që i paguajnë në çast në kushte informaliteti dhe në mashtrim të plotë. Kjo konkurrencë godet bujkun. Ky vit që u mbyll duke u nisur nga cikli i pare i prodhimit në tregjet ndërkombëtare ka pasur çmime të larta ndërsa këto për bujqit janë njësoj si viti më parë. Zona e Divjakës nuk ka marrë ende paratë e shalqinit që ka shitur në maj e qershor. Duhet të ketë formalizim për kontratë mes bujkut dhe grumbulluesit dhe ligjërim të transaksionit përmes një fature që sot nuk ekziston. Kjo bën që bujku të mbrohet. Duhet mbrojtur bujku dhe prandaj ky ligj bën të detyrueshme që grumbulluesit apo përpunuesit të kenë kontrata dhe fatura ligjore.
