TIRANË– Është shoqëruar me debate dhe diskutime të forta mbledhja e parë e Komisionit të Sigurisë për këtë vit. Gjatë fjalës së tij deputeti demokrat Flamur Noka u shpreh se kryeministri Edi Rama i ka futur “thikë” pas shpine Kosovës në lidhje me tensionet e fundit në veri. Sipas Nokës kjo është një tradhti kombëtare.
Flamur Noka: Ajo që na shqetëson është fakti se në këtë situatë përballë këtyre zhvillimeve qeveria përgjithësisht ka luajtur rolin e strucit dhe në shumë raste të tjera. Kryeministri i Shqipërisë ka bërë atë që ishte jashtë çdo perceptimi ta bëjë një kryeministër i Shqipërisë. Ka deklaruar, shfaqur hapur dashurinë për Ballkanin e hapur duke anashkaluar Kosovën, duke i futur thikë pas shpine Kosovës dhe duke shfaqur një dashuri deri në dashuri patetike për Vuciçin dhe për qeverinë e Serbisë. Këto gjëra në kohë moderne, quhen tradhti kombëtare. Në këtë kohë, në këtë mënyrë, ndodh tradhtia kombëtare. Deklaron kryeministri i Serbisë që do dërgoj 1 mijë trupa në territor shqiptar dhe kryeministri fut kokën si struci dhe s’bën asnjë deklaratë kundër Vuçiç. Prisja nga ministri që të tregonte pak senisibiltet të shtuar dhe jo të fliste në mënyrë kaq mekanike dhe pa asnjë emocion sikurse po fliste për Pakistanin. Duke qenë se është e gjitha rilindje, rilindja ka vëlla serbin dhe komshi kosovarin. Ky është realiteti.
