TEPELENË– Pak orë pas arrestimit të mësuesit Kleanth Laçit nga policia nën akuzën e ngacmimit seksual për dy nxënëse të mitura kanë reaguar kolegët e tij të cilët shprehen të habitur për akuzat e ngritura ndaj tij dhe shprehen se e gjithë kjo mund të jetë një inskenim. Kjo pasi sipas tyre mësuesi nuk ka shfaqur shenja për sjellje të pahijshme.
Mësuesi: Unë kam 6 vite në këtë shkollë dhe nuk e mendoj se profesori të ketë bërë diçka të tillë. Unë si mësuese për atë profesor nuk e mendoj se e ka bërë diçka të tillë. Edhe mund të jetë e inskenuar. Unë nuk e kam parë gocën që pretendon se është ngacmuar seksualisht. Unë kam dëgjuar vetëm për një nxënëse të ngacmuar. Por me pak fjalë nuk e besoj që profesor Keli ta ketë bërë një gjë të tillë.
Ndëersa drejtoresha e shkollës ku jepte mësim Laçi nuk ka preferuar të prononcohet për mediat në lidhje me ngjarjen.
Mësuesi i fiskulturës Kleanth Laçi u dhunua në mënyrë barbare dy ditë më parë nga tre persona, dy prej të cilëve vëllezërit e dy vajzave që pretendojnë se janë ngacmuar seksualisht nga ai. Ata e kanë thirrur mësuesin në makinë dhe pasi ai ka hipur e kanë dhunuar duke e goditur në kokë e në fytyre ku mori dëmtime të shumta. Njëri prej autorëve u dorëzua vetë në polici. Alvi Gumeni ka thënë para oficerëve të policisë se ishte kthyer nga emigrimi pasi motra e kishte marrë në telefon dhe i ka kërkuar ndihmë pasi mësuesi e ngacmonte. Me tu kthyer në vend ai organizoi planin e “hakmarrjes” ndaj Laçit bashkë me vëllain e vajzës tjetër që pretendon se është ngacmuar, i cili u arrestua ditën e sotme. Ndërkohë ministria e Arsimit e ka pezulluar nga detyra Kleanth Laçin dhe nëse vërtetohen akuzat ndaj tij ai do të përjashtohet nga sistemi arsimor menjëherë.
