TIRANË– Një 34-vjeçar ka rënë në prangat e policisë ditën e sotme pasi tentoi të fuste në vend naftë kontrabantë. Raportohet se Klodian Balliu u ndalua nga efektivët e policisë kufitarë në Bllatë ku pas kontrollit të automjetit të tij tip “Audi Q7” u gjet një sasi nafte të kontrabanduar, e cila u sekuestrua në cilësinë e provës materiale.
NJOFTIMI I POLICISË:
“PKK Bllatë/Evidentohet dhe goditet një rast i tentativës për të futur në vendin tonë, sasi nafte të kontrabanduar. Arrestohet në flagrancë 34-vjeçari që e transportonte naftën e kontrabanduar, me automjet. Shërbimet e Stacionit të Policisë Kufitare Bllatë, në bashkëpunim me specialistët e seksionit për Hetimin e Krimeve Ekonomike dhe Financiare të DVP Dibër, bazuar në analizën e riskut, si dhe në vijim të kontrolleve ndaj shtetasve dhe mjeteve me të cilat ata lëvizin, me qëllim parandalimin, evidentimin dhe goditjen e krimeve kufitare, në hyrje të Republikës së Shqipërisë, kanë kaluar për kontroll në vijën e dytë, automjetin tip “Audi Q7”, me drejtues shtetasin K. B., 34 vjeç.
Gjatë kontrollit të ushtruar në automjetin që drejtonte 34-vjeçari, shërbimet e Policisë gjetën një sasi nafte të dyshuar të kontrabanduar, e cila u sekuestrua në cilësinë e provës materiale. Në vijim të veprimeve procedurale për këtë rast, u arrestua në flagrancë shtetasi K. B. 34 vjeç, për veprën penale “Kontrabanda me mallra për të cilat paguhet akcizë”.
Materialet procedurale i kaluan Prokurorisë pranë Gjykatës së Rrethit Gjyqësor Dibër, për veprime të mëtejshme.
