SHKODËR– Dhuna ndaj ish-këshilltarit të ish-presidentit Ilir Meta dhe dhuna e përsëritur ndaj shqiptarëve në doganën e Malit të Zi kërkojnë reagim. Kështu është shprehur kryetari i Bashkisë së Shkodrës Bardh Sopahia, i cili ka kërkuar që autoritetet të reagojnë dhe të merren masa. Në një postim në Facebook ku ka shpërndarë një video ku dëgjohen efektivët që flasin me një shqiptar, i cili kërkon drejtësi për faktin që është dhunuar në kufi.
POSTIMI I BARDH SPAHISË:
Asnjë fjalë nga autoritetet shqiptare për dhunën në kufirin mes Shqipërisë dhe Malit të Zi, në doganën e Muriqanit ndaj shtetasve shqiptarë. E ndërsa heshtja mbetet kryefjalë e palës shqiptare dhe asaj malazeze, një tjetër video ka dalë në rrjetet sociale ku dëshmohet me zë dhe figurë se fenomeni nuk është i izoluar, por një rast i përsëritur. Dhuna mbetet një akt i papranueshëm, prandaj e dënoj me forcë këtë sjellje të individëve që mbajnë uniformën e shtetit dhe sillen në mënyrë brutale me qytetarët, kur do të duhej të dëshmohej krejt e kundërta. Shteti shqiptar nuk ka asnjë arsye të mos reagojë, e aq më pak t’i trajtojë këto incidente me indiferentizëm sikur të mos ketë ndodhur asgjë. Në njërin krah kryeministri propagandon nismën e “Ballkanit të Hapur”, e në krahun tjetër ai dhe institucionet e varësisë mbyllin sy e veshë përballë shfaqjeve të tilla që nuk i shërbejnë aspak raporteve të fqinjësisë së mire.
