VLORË– Katër persona kanë rënë në prangat e policisë së Vlorës pasi ishin shpallur në kërkim për vepra të ndryshme penale. Operacioni “Top Secret” i zhvilluar nga blutë e Vlorës i koduar “Wanted” kishte për qëllim kapjen e personave me rrezikshmëri të lartë dhe të dënuar për vrepra penale të ndryshme dhe vënien e tyre para organeve të drejtësisë. Në pranga ka rënë një 64-vjaçar i identifikuar me inicialet M.M pasi ishte shpallur në kërkim nga SPAK për korrupsion pasiv i personave që ushtrojnë funksione publike. Gjithashtu në pranga ka rënë dhe 39-vjeçari Arsen Shyti, pasi Gjykata e Rrethit Gjyqësor Vlorë e ka dënuar me 3 vjet, 3 muaj e 25 ditë burgim, për veprat penale “Prodhimi dhe shitja e narkotikëve” dhe “Prodhimi dhe mbajtja pa leje e municioneve”. Janë arrestuar dhe Miky Ibrahimi, 44-vjeç, i dënuar me 3 vjet burgim, për heqje të paligjshme të lirisë dhe Eliton Demiraj, 41-vjeç i dënuar me 8 muaj bug për vjedhje të energjisë elektrike.
NJOFTIMI I POLICISË:
DVP Vlorë/Kontrolle të befasishme për kapjen e personave të shpallur në kërkim dhe vënien e tyre përpara përgjegjësisë ligjore. Finalizohet operacioni policor i koduar “Wanted”. Kapen dhe vihen në pranga 4 shtetas të shpallur në kërkim për vepra të ndryshme penale. Strukturat e DVP Vlorë, në bashkëpunim me shërbimet e Komisariateve në varësi, në vijim të punës për goditjen e paligjshmërive, kanë hartuar një plan masash në kuadër të të cilit janë zhvilluar kontrolle të befasishme në ambiente të ndryshme që mund të frekuentohen nga persona të shpallur në kërkim, me qëllim kapjen dhe vënien e tyre përpara përgjegjësisë penale. Si rezultat i kontrolleve të ushtruara janë kapur 4 shtetas të shpallur në kërkim, për vepra të ndryshme penale.
Shërbimet e Sektorit të Hetimit të Krimeve, në bashkëpunim me Forcën Operacionale, të DVP Vlorë, kanë kapur shtetasit:
– M. M., 64 vjeç, banues në Vlorë, i shpallur në kërkim pasi Prokuroria e Posaçme kundër Korrupsionit dhe Krimit të Organizuar i ka caktuar masën e sigurisë “Arrest në burg”, për veprën penale “Korrupsioni pasiv i personave që ushtrojnë funksione publike”;
– Arsen Shyti, 39 vjeç, banues në Vlorë, pasi Gjykata e Rrethit Gjyqësor Vlorë e ka dënuar me 3 vjet, 3 muaj e 25 ditë burgim, për veprat penale “Prodhimi dhe shitja e narkotikëve” dhe “Prodhimi dhe mbajtja pa leje e municioneve”.
Shërbimet e Komisariatit të Policisë Vlorë kanë kapur shtetasit:
– Miky Ibrahimi, 44 vjeç, banues në Vlorë, pasi Gjykata e Rrethit Gjyqësor Vlorë e ka dënuar me 3 vjet burgim, për veprën penale “Heqja e paligjshme e lirisë”;
-Eliton Demiraj, 41 vjeç, banues në Vlorë, pasi Gjykata e Rrethit Gjyqësor Vlorë e ka dënuar me 8 muaj burgim, për veprën penale “Vjedhja e energjisë elektrike”. Materialet i kaluan Prokurorisë, për veprime të mëtejshme procedurale.
