TIRANË– Në Gjykatën Kushtetuese ka nisur seanca e dytë për shqyrtimin e mandatit të deputetes njëherazi dhe ministres së Jashtme Olta Xhaçka padi e ngritur nga 28 deputetët demokratë. Duke folur në seancë avokati i ministres është shprehur se Xhaçka nuk rezulton të ketë përfitime nga të mirat publike, ndërsa shtoi se kërkimet e paraqitura nuk legjitimohen që të vënë në lëvizje Gjykatën Kushtetuese.
Genci Çifligu: Nuk rezulton që deputetja Olta Xhaçka të ketë përfituar fonde publike. Xhaçka si anëtare e kabinetit qeveritar nuk rezulton të ketë përfitime nga të mirat publike. Kërkimet e paraqitura nuk legjitimohen që të vënë në lëvizje GjK. Nuk jemi në kushtet e papajtueshmërisë. Nuk ka asnjë kontratë të lidhur mes shoqërisë dhe bashkisë Himarë pasi ndodhemi ende në procesin e ndërtimit të strukturës hoteliere. Fakti se deputetes i janë drejtuar Kuvendit ne 1 korrik 2022, nuk i legjitimon pasi ka kaluar afati. Afati nis me botimin e vendimit te qeverise për investitorin strategjik më datë 9 mars 2022 në fletoren zyrtare.
Sipas opozitës ministrja është në konfikt interesi pasi bashkëshorti i saj është shpallur investitor strategjik nga qeveria dhe ka përfituar tokë shtet në Dhërmi për ndërtimim e një resorti. Sipas avokatit të Xhaçkës, Genci Çifligu, shqyrtimi i papajtueshmërisë së mandatit në Gjykatën Kushtetuese është në tejkalim të afateve kohore të parashikuara në ligj dhe kësisoj “nuk përbën subjekt kushtetues”.
