TIRANË– Deputeti i Partisë Demokratike Agron Shehaj, i cili është dhe një nga firmëtarët e kërkesë padisë dorëzuar në Gjykatën Kushtetuese në lidhje me mandatin e deputetes njëherazi dhe ministres së Jashtme Olta Xhaçka ka folur për mediat në dalje të Gjykatës. Ai tha se Kushtetuesja i ka të gjitha provat që sipas tij vërtetojnë se ministrja e Jashtme Olta Xhaçka ka përfituar para publike. Shehaj shtoi se ministrja ka përfituar nga pronat publike nëpërmejt bashkëshortit të saj.
Agron Shehaj: Është shumë e qartë, zonja Xhaçka ministre e Jashtme ka përfituar nga prona publike. E ka bërë këtë duke përdorur bashkëshortin dhe kunatën. Sot avokati i Xhaçkës, pranoi vetë që shtetasja e huaj që ka marrë statusin e investitorit strategjik për të fshehur bashkëshortin e Xhaçkës, është kunata e zonjës Xhaçka. Kështu që vendimi në gjykimin tonë është shumë i thjeshtë. Ne besojmë se Gjykata Kushtetuese, ka krijuar një precedent, standard, atë që të heqë mandatin e deputetëve nëse këta përfitojnë nga prona publike. Jemi të bindur që ka vetëm një mundësi përballë këtij abuzimi dhe akti korruptiv, përndryshe do të ishte realisht një dëm shumë i madh për besueshmërinë e kësaj gjykate që me vendimin e saj do ta nxirrte të larë deputeten Xhaçka.
Pyetje: Ka një pretendim nga pala mbrojtëse dhe Kuvendit, që është tejkaluar afati 3 mujor për shqyrtimin?
Agron Shehaj: Nëse vendimi dhe nëse Gjykata do të jetë e drejtë, nuk ka asnjë arsye dhe i ka të gjitha provat për të marrë vendimin e duhur. Nëse ka një vendim tjetër që është marrë, ka justifikime, pretekste sa të duam dhe sa të duan për ta marrë atë vendim.
Pyetje: Fjalimi juaj i fundit në seancë ishte një lloj presioni ndaj Gjykatës Kushtetuese:
Agron Shehaj: Në asnjë mënyrë nuk ishte presion, u kujdesa shumë që të mos mbaj një fjalim që të dukej si presion, por fakti është se ne jetojmë në një vend ku mungon drejtësia, ku njerëzit largohen se nuk ka drejtësi sepse mendojnë se njerëzit e pushtetshëm si Xhaçka janë mbi ligjin, të praprekshëm dhe nuk ndëshkohen. Kurse qytetarët e thjeshtë ndëshkohen padrejtësisht dhe të vetmen alternativë që kanë është ajo që të largohen nga vendi.
