BRUKSEL– Komisioni Evropian mund të nisë një hetim kundër Komisionerit të Zgjerimit të BE-së, Oliver Varhelyi në ditët në vijim. Raporti i cili kërkon marrjen e këtij vendimi është pranuar tashmë nga komiteti i punëve të jashtme të PE. Sipas kësaj, edhe pse Varhelyi thotë hapur të kundërtën, ai në fakt po përpiqet qëllimisht të minojë rëndësinë e kushteve të sundimit të ligjit të vendeve që dëshirojnë të anëtarësohen në bashkim.
“Komisioneri përgjegjës për Politikat e Fqinjësisë dhe Zgjerimin synon qëllimisht të anashkalojë dhe minojë rëndësinë qendrore të reformave demokratike dhe të sundimit të ligjit të vendeve që aderojnë në BE”, thuhet në raportin e miratuar tashmë nga Komiteti i Punëve të Jashtme të BE-së.
Në këtë raport, ata bëjnë thirrje gjithashtu për një hetim të nisur nga Komisioni Evropian për të kontrolluar aktivitetet aktuale të komisionerit. Vetë raporti pritet të votohet në Parlamentin Evropian në ditët në vijim. Deputeti social demokrat holandez në PE, Thijs Reuten i tha gazetës se parlamenti dëshiron ta shohë qartë këtë akuzë. Ata dëshirojnë të vlerësojnë nëse Varhelyi e kryen punën e tij pavarësisht nga çdo ndikim politik dhe duke marrë parasysh interesat e përgjithshme të BE-së.
Janë botuar shumë artikuj dhe qarkullojnë informacione të tjera se, sipas përfaqësuesit, se Varhelyi përpiqet të vendosë në plan të dytë pritshmëritë nga aspektet e demokracisë dhe shtetit ligjor kur vlerëson performancën e vendeve që dëshirojnë të anëtarësohen. Reuten shton se Varhelyi kujdeset që gjithmonë të thotë diçka ndryshe në publik.
Varhelyi u kritikua gjithashtu nga Parlamenti Evropian verën e kaluar për arsye të ngjashme. Në atë kohë, në raportin e tij për Serbinë, parlamenti shprehu shqetësim për pretendimet e publikut se Varhelyi nuk i kushtonte rëndësi të mjaftueshme disa çështjeve që lidhen me sundimin e ligjit në vendet në pritje të pranimit.
