TIRANË– Hetimet e Prokurorisë për të zbardhur burimin e 120 mijë eurove të vjedhura nga pastruesja Rozeta Dobi dhe i biri Havier Dobi në shtëpinë e ish-shefes së Kabinetit të ish-ministrit Arben Ahmetaj, Alda Klosi është shtrirë deri përtej oqeanit. Kështu mësohet se pas deklaratës së Klosit se 120 mijë eurot i ishin dhënë nga xhaxhai që jeton në Shtetet e Bashkuara të Amerikës për të mobiluar shtëpinë, heturesit po verifikojnë burimin e të ardhurave të xhaxhait të Klosit. Ai momentalisht po kurohet për shkak të një sëmundjeje të rëndë.
Verifikimet janë të domosdoshme pas deklarimeve dhe dokumentave që Klosi ka paraqitur përpara hetuesve për të justifikuar shumën prej 120 mijë eurosh që u pretendua se ia kishte marrë pastruesja. Tashmë xhaxhai i Alda Klosit nuk duhet vetëm që të pohojë nëse paratë janë të tijat por dhe ti justifikojë ato.
Vjedhja në shtëpinë e ish-zyrtares së lartë Alda Klosi në “Rrugën e Kosovarëve” ndodhi disa ditë më parë. Për vjedhjen e 120 mijë eurove nga kasaforta e Klosit është arrestuar pastruesja Rozeta Dobi dhe i biri Havier Dobi të cilët kanë pranuar krimin para policisë. Por ajo që mbetet ende një mister i “pazgjidhshëm” për drejtësinë e policinë janë 400 mijë eurot e gjetura në shtëpinë e pastruese Rozeta Dobi, të cilat ishin fshehur në tubin e aspirimit. Deri më tani askush nuk u ka dalë për zot apo ti denoncojë të vjedhura. Klosi e mohon të jenë të sajat ndërsa Rozeta Dobi ende nuk ka pranuar të flasë për to. Dobi njihet si pastruesja e VIP-ave pasi është kujdesur për mirëmbajtjen e disa personaliteteve të larta të shtetit emri i të cilëve nuk është bërë ende i ditur. Të kujt janë 400 mijë eurot është pyetja që ende drejtësia nuk i është përgjigjur dhe me këto ritme që po ecin hetimet një përgjigje e shpejtë është ende shumë larg.
