TIRANË– Dita e sotme nuk mund të ketë qenë shumë e lehtë për ministren e Jashtme Olta Xhaçka mandati i së cilës u shqyrtua për orë të tëra në Gjykatën Kushtetuese pas padisë së bërë nga 28 deputetët të Partisë Demokratike, të cilët kërkojnë heqjen e mandatit për të. Ata e akuzojnë ministren se ka përfituar para publike nëpërmjet bashkëshortit të saj, i cili është shpallur investitor strategjik nga qeveria dhe ka përfituar tokë në bregdetin e “lakmueshëm” të Dhërmiut.
Por mesa duket shefja e diplomacisë së Jashtme shqiptare ka gjetur kohë për të qetësuar “nervat”. Ajo u fotografua në Pallatin e Brigadave krah presidentit Bajram Begaj dhe Zonjës së Parë gjatë pritjes që Kreu i Shtetit bëri për trupën diplomatike të akredituar në vendin tonë. E veshur me të zeza Xhaçka duket se nuk po kalon ditë të mira sa i përket karrirës politike por ende nuk ka asnjë deklaratë prej saj. Në seancë ajo u mbrojt nga avokati.
Por lajmi nuk është vetëm prania e ministres së Jashtme në takim por edhe deputetëve demokratë. Mesa duket presidenti Begaj ia ka dalë të “bashkojë” opozitën. Në fotot e siguruara nga “Newszone” shihet se Lulzim Basha është në ceremony mbase jo vetëm si deputet por dhe si një ish-ministër i Jashtëm gjatë qeverisjes së Partisë Demokratike. Po ashtu Kreu i Shtetit duket se nuk ka bërë “selektime” mes opozitës pasi ka ftuar dhe deputetët që mbështesin kryedemokratik Sali Berisha. Në ceremoni merrte pjesë dhe deputeti Tritan Shehu. Në foto ai shihet i largët me Bashën dhe nuk dihet nëse janë takuar me njëri-tjetrin qoftë edhe për një shtrëngim duarsh.
